മൈസൂരു പബ്ബിൽ വൻ തീപിടിത്തം! രണ്ട് മരണം, ഉടമ ഉൾപ്പെടെയുള്ളവർക്ക് പരിക്ക്

മൈസൂരു : കർണാടകയിലെ മൈസൂരുവിലുള്ള പ്രമുഖ റെസ്റ്റോ പബ്ബിലുണ്ടായ വൻ തീപിടിത്തത്തിൽ രണ്ട് പേർ മരിച്ചു. പബ്ബിലെ ജീവനക്കാരായ ഡാർജിലിംഗ് സ്വദേശി സാഹിൻ (26), നേപ്പാൾ സ്വദേശി പ്രകാശ് (24) എന്നിവരാണ് മരണപ്പെട്ടത്. അപകടത്തിൽ പബ്ബ് ഉടമ പ്രീതം പുമീത്, ഉപഭോക്താക്കളായ സോനു, രമേഷ്, മഹാദേവ് പ്രസാദ്, പ്രജ്വൽ, അവിനാഷ് എന്നിവരടക്കം നിരവധി പേർക്ക് പരിക്കേറ്റു. തിങ്കളാഴ്ച ഉച്ചയ്ക്ക് ശേഷമായിരുന്നു ദാരുണമായ ഈ സംഭവം നടന്നത്.

ദത്തഗല്ലിയിലെ ‘ഫോക്സ് ഡെൻ ലിക്വർ ഗാരേജ്’ എന്ന പബ്ബിലാണ് അപകടമുണ്ടായത്. തീപിടിത്തത്തെ തുടർന്ന് കെട്ടിടത്തിനുള്ളിൽ കനത്ത പുക ഉയർന്നത് പരിഭ്രാന്തി പരത്തി. ഗോവണികൾ ഉപയോഗിച്ച് ഏകദേശം പതിനഞ്ചോളം പേരെ അഗ്നിശമന സേനാംഗങ്ങൾ സുരക്ഷിതമായി പുറത്തെത്തിച്ചു. പരിക്കേറ്റവർ നിലവിൽ പ്രദേശത്തെ ആശുപത്രികളിൽ ചികിത്സയിലാണ്. ഇവരുടെ പരിക്ക് ഗുരുതരമല്ലെന്നാണ് പ്രാഥമിക വിവരം.

ഷോർട്ട് സർക്യൂട്ടാണ് അപകടത്തിന് കാരണമായതെന്നാണ് പ്രാഥമിക നിഗമനം. പബ്ബിനുള്ളിൽ വലിയ രീതിയിൽ മര ഉരുപ്പടികളും മറ്റ് അലങ്കാര വസ്തുക്കളും സൂക്ഷിച്ചിരുന്നതിനാൽ തീ അതിവേഗം പടരുകയായിരുന്നുവെന്ന് ഫയർ ഓഫീസർ രംഗനാഥ് അറിയിച്ചു. സംഭവത്തിൽ മൈസൂരു പൊലീസും അഗ്നിശമന സേനയും സംയുക്തമായി വിശദമായ അന്വേഷണം ആരംഭിച്ചിട്ടുണ്ട്.