പശ്ചിമബംഗാളിൽ വോട്ടെടുപ്പിന് മുന്നോടിയായി വ്യാപക റെയ്ഡ്; നൂറുകണക്കിന് ബോംബുകൾ പിടിച്ചെടുത്തു

കൊൽക്കത്ത: പശ്ചിമബംഗാളിൽ ബുധനാഴ്ച നടക്കാനിരിക്കുന്ന അവസാനഘട്ട വോട്ടെടുപ്പിന് മുന്നോടിയായി സംസ്ഥാനത്ത് സുരക്ഷാസേനയുടെ വ്യാപക പരിശോധന. തിരഞ്ഞെടുപ്പ് കമ്മീഷന്റെയും സംസ്ഥാന പോലീസ് മേധാവിയുടെയും നിർദ്ദേശപ്രകാരം ‘സ്പെഷ്യൽ ബോംബ് ഡ്രൈവ്’ എന്ന പേരിലാണ് സംസ്ഥാനത്തുടനീളം റെയ്ഡ് നടക്കുന്നത്. പ്രശ്നബാധിത മേഖലകളായ 24 പർഗനാസ്, മുർഷിദാബാദ്, ഭവാനിപ്പൂർ എന്നിവിടങ്ങളിൽ സുരക്ഷാസേന പരിശോധന കർശനമാക്കി.

പരിശോധനകളിൽ വ്യാപകമായി ബോംബുകൾ കണ്ടെത്തിയിട്ടുണ്ട്. സൗത്ത് 24 പർഗനാസിലെ ഒരു വീട്ടിൽ നിന്ന് മാത്രം നൂറിലധികം നാടൻ ബോംബുകളാണ് കണ്ടെടുത്തത്. ഇത് ഒരു തൃണമൂൽ കോൺഗ്രസ് പ്രവർത്തകന്റെ വീടാണെന്നാണ് പ്രാഥമിക റിപ്പോർട്ടുകൾ സൂചിപ്പിക്കുന്നത്. മറ്റൊരു വീട്ടിൽ നിന്ന് 79 ബോംബുകളും പോലീസ് പിടിച്ചെടുത്തു. ഈ കേസുകളെല്ലാം വിശദമായി അന്വേഷിക്കുന്നതിനായി ദേശീയ അന്വേഷണ ഏജൻസിക്ക് (NIA) കൈമാറാൻ തിരഞ്ഞെടുപ്പ് കമ്മീഷൻ ഉത്തരവിട്ടു.

വോട്ടെടുപ്പ് നടക്കുന്ന 142 മണ്ഡലങ്ങളിലും അതീവ സുരക്ഷാ ക്രമീകരണങ്ങളാണ് ഏർപ്പെടുത്തിയിരിക്കുന്നത്. കഴിഞ്ഞ ദിവസങ്ങളിൽ നടന്ന അക്രമസംഭവങ്ങളുടെ പശ്ചാത്തലത്തിൽ വി.ഐ.പി റാലികൾ നടക്കുന്ന ഇടങ്ങളിൽ സുരക്ഷാ വലയം ഇരട്ടിയാക്കി. വോട്ടർ പട്ടിക പരിഷ്കരണത്തിന് ശേഷമുള്ള വോട്ടെടുപ്പായതിനാൽ ബി.ജെ.പി വലിയ പ്രതീക്ഷയിലാണ്. അതേസമയം, തങ്ങളുടെ ശക്തികേന്ദ്രങ്ങളിൽ ആധിപത്യം ഉറപ്പിക്കാനുള്ള തീവ്രശ്രമത്തിലാണ് തൃണമൂൽ കോൺഗ്രസ്.