തിരുവനന്തപുരം : ദീപാവലി പ്രമാണിച്ച് ലോകമെമ്പാടുമുള്ള കേരളീയര്ക്ക് ആശംസകൾ നേർന്ന് ഗവര്ണർ ആരിഫ് മുഹമ്മദ് ഖാൻ. ജനമനസ്സുകളിൽ ആഘോഷത്തിന്റെ ആനന്ദം പകരാനും വർദ്ധിച്ച ഐക്യബോധവും സമഷ്ടിസ്നേഹവും കൊണ്ട് നമ്മുടെ സാമൂഹിക ഒരുമയെ സുദൃഢമാക്കാനും ദീപങ്ങളുടെ ഈ ഉത്സവത്തിന് സാധിക്കുമാറാകട്ടെ എന്നാണ് ഗവർണർ ആശംസിച്ചിരിക്കുന്നത്.
നാളെയാണ് ഈ വർഷത്തെ ദീപാവലി ആഘോഷിക്കുന്നത്. ദീപങ്ങളുടെ ഉത്സവമാണ് ദീപാവലി. എല്ലാ വർഷവും കാർത്തിക മാസത്തിലെ അമാവാസി നാളിലാണ് ദീപാവലി ആഘോഷിക്കുന്നത്. 14 വർഷത്തെ വനവാസം പൂർത്തിയാക്കി ശ്രീരാമൻ അയോദ്ധ്യ നഗരത്തിൽ എത്തിയപ്പോൾ അദ്ദേഹത്തെ സ്വീകരിക്കാൻ അയോദ്ധ്യയിലെ ജനങ്ങൾ ദീപങ്ങൾ കൊണ്ട് നഗരം അലങ്കരിച്ചുവെന്നും അക്കാലത്ത് അയോദ്ധ്യ നഗരം ദീപങ്ങളുടെ പ്രകാശത്താൽ തിളങ്ങിയെന്നുമാണ് ഇതിന് പിന്നിലെ ഐതിഹ്യം. വിളക്ക് കത്തിക്കുന്ന ഈ പാരമ്പര്യം കണക്കിലെടുത്താണ് ഈ ഉത്സവത്തിന് ദീപാവലി എന്ന് പേരിട്ടത്. ദീപം എന്നാല് പ്രകാശമെന്നും വലി എന്നാല് ഒരു നിര എന്നാണുമര്ഥം. അങ്ങനെ ദീപാവലി എന്നാല് വിളക്കുകളുടെ ഒരു നിര എന്നാണ് അര്ത്ഥമാക്കുന്നത്.
