പുരുഷന്മാരെയും ആൺകുട്ടികളെയും പീഡനത്തിനിരയാക്കി ; കുടുംബാംഗങ്ങളെ തോക്കിൻ മുനയിൽ ലൈംഗിക ബന്ധത്തിന് ഭീഷണിപ്പെടുത്തി !! സ്ത്രീകളുടെ ശവശരീരങ്ങളെയും വെറുതെ വിട്ടില്ല ! ഹമാസ് ഭീകരരിൽ നിന്ന് ഇസ്രായേൽ ബന്ദികൾ നേരിട്ടത് അതിക്രൂരമായ ലൈംഗികാതിക്രമം; 300 പേജുള്ള അന്വേഷണ റിപ്പോർട്ട് പുറത്ത് !

ടെൽ അവീവ്: 2023 ഒക്ടോബർ 7-ന് ഇസ്രായേലിൽ നടന്ന ഹമാസ് ആക്രമണത്തിനിടയിലും അതിനുശേഷം ബന്ദികളാക്കപ്പെട്ടവർക്കിടയിലും വ്യാപകമായ ലൈംഗിക അതിക്രമങ്ങൾ നടന്നതായി സ്ഥിരീകരിക്കുന്ന അന്വേഷണ റിപ്പോർട്ട് പുറത്ത് . സ്വതന്ത്ര ഇസ്രായേൽ അന്വേഷണ കമ്മീഷൻ തയ്യാറാക്കിയ മുന്നൂറ് പേജുള്ള ഈ റിപ്പോർട്ടിൽ, ഹമാസും മറ്റ് സായുധ സംഘങ്ങളും ലൈംഗിക പീഡനങ്ങളെ ഒരു ആയുധമായി ഉപയോഗിച്ചുവെന്ന് അക്കമിട്ട് നിരത്തുന്നു. കൊല്ലപ്പെട്ടവരോടും ജീവിച്ചിരിക്കുന്നവരോടും ഒരുപോലെ ക്രൂരമായ രീതിയിലാണ് അക്രമികൾ പെരുമാറിയതെന്നാണ് റിപ്പോർട്ടിലെ കണ്ടെത്തൽ.

അതിജീവിച്ചവർ, ദൃക്‌സാക്ഷികൾ, മുൻ ബന്ദികൾ എന്നിവരുൾപ്പെടെ 430-ലധികം പേരുടെ മൊഴികളും പതിനായിരത്തിലധികം ഫോട്ടോകളും വീഡിയോകളും പരിശോധിച്ച ശേഷമാണ് ഈ റിപ്പോർട്ട് തയ്യാറാക്കിയത്. ബന്ദികളാക്കപ്പെട്ട കുടുംബാംഗങ്ങളെ പരസ്പരം ലൈംഗിക പ്രവൃത്തികളിൽ ഏർപ്പെടാൻ നിർബന്ധിച്ചുവെന്ന ഞെട്ടിക്കുന്ന വെളിപ്പെടുത്തലുകൾ റിപ്പോർട്ടിലുണ്ട്. കുടുംബബന്ധങ്ങളെ തകർക്കാനും മാനസികമായി തളർത്താനും ലക്ഷ്യമിട്ടുള്ള ‘കിനോസൈഡൽ’ ലൈംഗിക അതിക്രമങ്ങളാണ് നടന്നതെന്ന് അന്വേഷണസംഘം ചൂണ്ടിക്കാട്ടുന്നു. സ്ത്രീകളെ മാത്രമല്ല, പുരുഷന്മാരെയും ആൺകുട്ടികളെയും പ്രായമായവരെയും അക്രമികൾ ഇരകളാക്കിയതായി റിപ്പോർട്ട് വ്യക്തമാക്കുന്നു.

നോവ മ്യൂസിക് ഫെസ്റ്റിവൽ നടന്ന സ്ഥലത്തും സമീപത്തെ ഗ്രാമങ്ങളിലും സൈനിക താവളങ്ങളിലും നടന്ന ക്രൂരതകളുടെ നേർചിത്രമാണ് സാക്ഷിമൊഴികളിലൂടെ പുറത്തുവരുന്നത്. കൊല്ലപ്പെട്ട സ്ത്രീകളുടെ മൃതദേഹങ്ങൾ പരസ്യമായി അപമാനിക്കപ്പെട്ടുവെന്നും ലൈംഗിക വൈകൃതങ്ങൾക്ക് ഇരയാക്കിയ ശേഷം മൃതദേഹങ്ങൾ പ്രദർശിപ്പിച്ചുവെന്നും ദൃക്‌സാക്ഷികൾ വെളിപ്പെടുത്തി. ഗാസയിലെ തുരങ്കങ്ങളിലും സുരക്ഷിത കേന്ദ്രങ്ങളിലും മാസങ്ങളോളം ബന്ദികളായി കഴിഞ്ഞവർ ഇന്നും ആ മാനസികാഘാതത്തിൽ നിന്ന് മുക്തരായിട്ടില്ല.

ഇത്തരത്തിലുള്ള അതിക്രമങ്ങൾ വെറും ഒറ്റപ്പെട്ട സംഭവങ്ങളല്ലെന്നും മറിച്ച് കൃത്യമായ ആസൂത്രണത്തോടെ നടപ്പിലാക്കിയ തന്ത്രമാണെന്നും അന്വേഷണ കമ്മീഷൻ സ്ഥാപകൻ ഡോ. കൊചവ് എൽകായാം-ലെവി പറഞ്ഞു. യുദ്ധക്കുറ്റങ്ങൾക്കും വംശഹത്യയ്ക്കും സമാനമായ ക്രൂരതകളാണ് നടന്നതെന്ന് റിപ്പോർട്ട് ഉപസംഹരിക്കുന്നു. രാജ്യാന്തര സമൂഹത്തെ ഒന്നടങ്കം ഞെട്ടിക്കുന്ന ഈ വിവരങ്ങൾ വരും ദിവസങ്ങളിൽ ആഗോള തലത്തിൽ വലിയ ചർച്ചകൾക്ക് വഴിവെക്കും.