മുഖ്യമന്ത്രി കസേരയിൽ അനിശ്ചിതത്വം: കോൺഗ്രസിന്റെ മെല്ലെപ്പോക്കിൽ ലീഗിന് കടുത്ത അതൃപ്തി; വി.ഡി സതീശനായി സമ്മർദ്ദം ശക്തം

മലപ്പുറം: കേരളത്തിലെ ജനവിധി വന്ന് ദിവസങ്ങൾ പിന്നിട്ടിട്ടും മുഖ്യമന്ത്രിയെ നിശ്ചയിക്കുന്നതിൽ കോൺഗ്രസ് പുലർത്തുന്ന മെല്ലെപ്പോക്കിനെതിരെ മുസ്‌ലിം ലീഗ്. വി.ഡി. സതീശൻ മുഖ്യമന്ത്രിയാകണമെന്ന ജനവികാരം കോൺഗ്രസ് ഹൈക്കമാൻഡ് മാനിക്കണമെന്ന നിലപാടിൽ ഉറച്ചുനിൽക്കുന്ന ലീഗ്, ഭരണഘടനാപരമായ ഉത്തരവാദിത്തങ്ങളിൽ കോൺഗ്രസ് കാട്ടുന്ന അനാസ്ഥയെ പരോക്ഷമായി വിമർശിച്ചു. ബുധനാഴ്ച പാണക്കാട് സാദിഖലി ശിഹാബ് തങ്ങളുടെ അധ്യക്ഷതയിൽ ചേർന്ന അടിയന്തര നേതൃയോഗത്തിലാണ് കോൺഗ്രസിന്റെ തീരുമാനമില്ലായ്മ മുന്നണിയെ തളർത്തുന്നു എന്ന വികാരം ഉയർന്നത്.

മുഖ്യമന്ത്രിയെ കണ്ടെത്തുന്നത് ഏറെ ഉത്തരവാദിത്തമുള്ള വിഷയമാണെന്നും ഈ കാര്യത്തിൽ ഇനിയും കാലതാമസം വരുത്തുന്നത് ശരിയല്ലെന്നും ലീഗ് നേതൃത്വം ഓർമ്മിപ്പിച്ചു. ദില്ലിയിൽ നിന്നുള്ള തീരുമാനത്തിനായി കാത്തിരിക്കുകയാണെന്ന് പറയുമ്പോഴും, കോൺഗ്രസ് ആരെ നിശ്ചയിച്ചാലും അംഗീകരിക്കുമെന്ന പതിവ് വിട്ടുവീഴ്ചാ നിലപാട് ഇത്തവണ ലീഗ് സ്വീകരിച്ചിട്ടില്ല. ഘടകകക്ഷികളെ വിശ്വാസത്തിലെടുക്കാതെ ഏകപക്ഷീയമായ പ്രസ്താവനകൾ നടത്തുന്ന ചില കോൺഗ്രസ് നേതാക്കളുടെ രീതിക്കെതിരെയും യോഗത്തിൽ കടുത്ത അമർഷം രേഖപ്പെടുത്തി.

ഫലം വന്ന ഉടൻ തന്നെ എ.ഐ.സി.സി നിരീക്ഷകരെ കണ്ട് സതീശന്റെ കാര്യത്തിലുള്ള താല്പര്യം അറിയിച്ചിട്ടും അന്തിമ തീരുമാനമുണ്ടാകാത്തത് മുന്നണിക്ക് ഗുണകരമാകില്ലെന്നാണ് വിലയിരുത്തൽ. കോൺഗ്രസിനുള്ളിലെ ആഭ്യന്തര തർക്കങ്ങൾ ഭരണത്തിന്റെ തുടക്കത്തിൽ തന്നെ കരിനിഴൽ വീഴ്ത്തുന്നത് ശരിയല്ലെന്ന മുന്നറിയിപ്പും ലീഗ് നേതാക്കൾ നൽകുന്നു.

അതേസമയം, കോൺഗ്രസ് ഔദ്യോഗിക പ്രഖ്യാപനം നടത്തിയ ശേഷം മാത്രം തങ്ങളുടെ തുടർ നിലപാട് വ്യക്തമാക്കിയാൽ മതിയെന്നാണ് സാദിഖലി തങ്ങളുടെ അധ്യക്ഷതയിൽ ചേർന്ന യോഗം തീരുമാനിച്ചത്. മന്ത്രിസ്ഥാനങ്ങളുടെ എണ്ണത്തിലോ വകുപ്പുകളുടെ കാര്യത്തിലോ ഇത്തവണ വിട്ടുവീഴ്ച വേണ്ടെന്ന വികാരമാണ് ലീഗ് നേതാക്കൾക്കിടയിലുള്ളത്.