നാഷണല്‍ ഹെറാള്‍ഡ് കേസ്: സോണിയാഗാന്ധിയെ ചോദ്യം ചെയ്യുന്നത് വനിതാ ഉദ്യോഗസ്ഥയുടെ നേതൃത്വത്തില്‍ അഞ്ചംഗ ഇഡി സംഘമെന്ന് സൂചന, ചോദ്യം ചെയ്യലിനിടയിൽ ക്ഷീണം തോന്നിയാല്‍ വിശ്രമിക്കാൻ സൗകര്യം

ദില്ലി: നാഷണല്‍ ഹെറാള്‍ഡ് കേസില്‍ കോണ്‍ഗ്രസ് ഇടക്കാല അദ്ധ്യക്ഷ സോണിയാഗാന്ധിയെ ചോദ്യം ചെയ്യുന്നത് വനിതാ ഉദ്യോഗസ്ഥയുടെ നേതൃത്വത്തില്‍ അഞ്ചംഗ ഇഡി സംഘമാണെന്ന് സൂചന. അഡീഷണല്‍ ഡയറക്ടര്‍ പദവിയിലുളള വനിതാ ഉദ്യോഗസ്ഥയുടെ നേതൃത്വത്തിലാകുംചോദ്യം ചെയ്യാൻ സാധ്യത. ഇഡി വൃത്തങ്ങളെ ഉദ്ധരിച്ച്‌ ദേശീയ മാധ്യമങ്ങളാണ് ഇക്കാര്യം റിപ്പോർട്ട് ചെയ്തിരിക്കുന്നത്.

അഞ്ചംഗ ഉദ്യോഗസ്ഥ സംഘമാണ് സോണിയയില്‍ നിന്ന് വിവരങ്ങള്‍ തേടുന്നത്. ചോദ്യം ചെയ്യലിനിടെ ക്ഷീണം തോന്നിയാല്‍ വിശ്രമിക്കാനുളള സൗകര്യവും ഇഡി ഏര്‍പ്പെടുത്തിയിട്ടുണ്ട്. കഴിഞ്ഞ മാസം ചോദ്യം ചെയ്യലിന് ഹാജരാകാന്‍ നിര്‍ദ്ദേശിച്ചിരുന്നെങ്കിലും കൊറോണാനന്തര പ്രശ്‌നങ്ങളെ തുടര്‍ന്ന് നീട്ടിവെയ്‌ക്കണമെന്ന് സോണിയ അഭ്യർത്ഥിച്ചിരുന്നു.

ഇതേ തുടര്‍ന്നാണ് ഇന്ന് ഹാജരാകാന്‍ നിര്‍ദ്ദേശിച്ചത്. കൊറോണയ്‌ക്ക് ശേഷം ശ്വാസതടസവും അണുബാധയും ഉള്‍പ്പെടെയുളള പ്രശ്‌നങ്ങള്‍ക്ക് സോണിയ ചികിത്സയിലുമായിരുന്നു. ഇക്കാര്യം കൂടി പരിഗണിച്ചാണ് ആവശ്യമെങ്കില്‍ വിശ്രമിക്കാനുളള സൗകര്യവും ഇഡി ഏര്‍പ്പെടുത്തിയിരിക്കുന്നത്.

സോണിയയുടെ ആരോഗ്യകാര്യത്തില്‍ ഉള്‍പ്പെടെ പ്രത്യേക പരിഗണന നല്‍കി പ്രിയങ്ക ഗാന്ധിയെയും ഇഡി ഓഫീസിലേക്ക് പ്രവേശിപ്പിച്ചിട്ടുണ്ട്. എന്നാല്‍ ചോദ്യം ചെയ്യല്‍ നടക്കുന്നിടത്തേക്ക് പ്രിയങ്കയ്‌ക്ക് പ്രവേശനം അനുവദിച്ചിട്ടില്ല.

നാഷണല്‍ ഹെറാള്‍ഡ് പത്രത്തിന്റെ ഉടമസ്ഥരായ അസോസിയേറ്റഡ് ജേണല്‍സും സോണിയയും രാഹുലും ഡയറക്ടര്‍മാരായ യങ് ഇന്ത്യ പ്രൈവറ്റ് ലിമിറ്റഡും തമ്മില്‍ നടത്തിയ സാമ്പത്തിക ഇടപാടുകളില്‍ ക്രമക്കേട് ആരോപിച്ചാണ് അന്വേഷണം. നേരത്തെ രാഹുല്‍ ഗാന്ധിയെ ഇഡി അഞ്ച് ദിവസം ചോദ്യം ചെയ്തിരുന്നു.

സോണിയയുടെ ചോദ്യം ചെയ്യലിനെതിരെ കോണ്‍ഗ്രസ് ഡല്‍ഹിയിലുള്‍പ്പെടെ പ്രതിഷേധം സംഘടിപ്പിക്കുകയാണ്. മഹിളാ കോണ്‍ഗ്രസിന്റെ നേതൃത്വത്തില്‍ ഉള്‍പ്പെടെ പ്രതിഷേധം അരങ്ങേറുന്നുണ്ട്. ഇഡിയെ ദുരുപയോഗം ചെയ്യുന്നത് തടയണമെന്ന ബാനറുമായി പാര്‍ലമെന്റ് മന്ദിര പരിസരത്തും കോണ്‍ഗ്രസ് നേതാക്കള്‍ പ്രകടനം നടത്തിയിരുന്നു.