നവകേരള മർദ്ദനക്കേസ് അട്ടിമറി! എം.ആർ അജിത് കുമാറിനോട് വിശദീകരണം തേടാൻ ഡിജിപി

ആലപ്പുഴ: നവകേരള യാത്രയ്ക്കിടയിലെ ‘രക്ഷാപ്രവർത്തന’ മർദ്ദനക്കേസ് അട്ടിമറിച്ച സംഭവത്തിൽ എഡിജിപി എം.ആർ അജിത് കുമാറിൽ നിന്ന് വിശദീകരണം തേടാൻ ഡിജിപി. കേസ് അട്ടിമറിച്ചതിൽ എഡിജിപിയുടെ പങ്ക് വ്യക്തമാക്കുന്ന പ്രത്യേക അന്വേഷണസംഘത്തിന്റെ പുതിയ റിപ്പോർട്ട് ഡിജിപിക്ക് ലഭിച്ച സാഹചര്യത്തിലാണ് ഈ നീക്കം. എഡിജിപിയുടെ വിശദീകരണം കൂടി രേഖപ്പെടുത്തിയ ശേഷമാകും ഡിജിപി സർക്കാരിന് അന്തിമ റിപ്പോർട്ട് സമർപ്പിക്കുക. ഈ നിർണ്ണായക നീക്കങ്ങൾക്കിടെ പുതിയ ഡിജിപി നിയമനത്തിനുള്ള സ്ക്രീനിംഗ് കമ്മിറ്റി നടപടികൾ സർക്കാർ ആരംഭിച്ചതായും വിവരമുണ്ട്.

മുഖ്യമന്ത്രി പിണറായി വിജയന്റെ നവകേരള യാത്രയ്ക്കിടെ പ്രതിഷേധിച്ച കെഎസ്‌യു, യൂത്ത് കോൺഗ്രസ് പ്രവർത്തകരെ മുഖ്യമന്ത്രിയുടെ സുരക്ഷാ ഉദ്യോഗസ്ഥർ മർദ്ദിച്ച കേസിലാണ് എഡിജിപിയുടെ നേതൃത്വത്തിൽ അട്ടിമറി നടന്നതായി കണ്ടെത്തിയിരിക്കുന്നത്. കേസ് ആദ്യം അന്വേഷിച്ചിരുന്ന ഉദ്യോഗസ്ഥരെ എഡിജിപിയുടെ ഓഫീസിലേക്ക് വിളിച്ചുവരുത്തി കേസ് ഡയറിയിൽ തിരുത്തലുകൾ വരുത്തിയെന്ന് മുൻ അന്വേഷണസംഘം എസ്ഐടിക്ക് മൊഴി നൽകിയിട്ടുണ്ട്. എഡിജിപിയുടെ പൂർണ്ണ അറിവോടെ ഗ്രേഡ് എസ്ഐമാരായ ഗിരീഷും ശ്രീകാന്തും ചേർന്ന് ഔദ്യോഗിക രേഖകളിൽ കൃത്രിമം കാണിക്കുകയും ഉദ്യോഗസ്ഥരെ ഭീഷണിപ്പെടുത്തുകയും ചെയ്തുവെന്ന ഗുരുതരമായ വെളിപ്പെടുത്തലുകളാണ് ഇപ്പോൾ പുറത്തുവന്നിരിക്കുന്നത്.