കൗബോയ് ലുക്കിൽ തിളങ്ങി മോഹൻലാൽ;സോഷ്യൽ മീഡിയയിൽ തരംഗമായി ചിത്രങ്ങൾ

സിനിമകളുടെ തിരക്കുകളിൽ നിന്ന് ചെറിയൊരു ഇടവേളയെടുത്ത് അമേരിക്കൻ യാത്രയിലാണ് മലയാളികളുടെ പ്രിയതാരം മോഹൻലാൽ. ലോകകപ്പ് ഫുട്ബോൾ മത്സരങ്ങൾ നേരിട്ട് കാണാൻ യു.എസിലെത്തിയ താരത്തിന്റെ ഏറ്റവും പുതിയ ചിത്രങ്ങളാണ് ഇപ്പോൾ സോഷ്യൽ മീഡിയയിൽ വൈറലാകുന്നത്.
ഒരു വെസ്റ്റേൺ കൗബോയ് ലുക്കിലാണ് താരം പുതിയ ചിത്രത്തിൽ പ്രത്യക്ഷപ്പെട്ടിരിക്കുന്നത്. തലയിൽ കൗബോയ് ഹാറ്റും, ഒപ്പം എംബ്രോയ്ഡറി വർക്കുകളുള്ള വൈറ്റ് ഫുൾ സ്ലീവ് ഷർട്ടും ധരിച്ചുള്ള മോഹൻലാലിന്റെ സ്റ്റൈലിഷ് ലുക്ക് ആരാധകർ ഏറ്റെടുത്തു കഴിഞ്ഞു.
യൂറോപ്യൻ പര്യടനത്തിന് ശേഷമാണ് മോഹൻലാൽ അമേരിക്കയിൽ എത്തിയത്. തരുൺ മൂർത്തി സംവിധാനം ചെയ്യുന്ന ‘അതിമനോഹരം’ എന്ന ചിത്രത്തിന്റെ ഷെഡ്യൂൾ ബ്രേക്കിൽ സ്റ്റേജ് ഷോകളുമായി യൂറോപ്പിലായിരുന്നു താരം. അവിടെ നിന്നാണ് ലോകകപ്പ് ആവേശത്തിലേക്ക് അദ്ദേഹം എത്തിയത്.
അമേരിക്കയിലെ ലോകകപ്പ് ഗാലറികളിൽ നിന്നുള്ള മോഹൻലാലിന്റെ ചിത്രങ്ങളും വീഡിയോകളും കഴിഞ്ഞ ദിവസങ്ങളിൽ സോഷ്യൽ മീഡിയയിൽ വലിയ രീതിയിൽ പ്രചരിച്ചിരുന്നു. കഴിഞ്ഞ രണ്ട് സെമിഫൈനലുകളും കാണാൻ താരം ഗാലറിയിൽ എത്തിയിരുന്നു.
കഴിഞ്ഞ ദിവസം നടന്ന അർജന്റീന-ഇംഗ്ലണ്ട് മത്സരം കാണാൻ മോഹൻലാലിനൊപ്പം ആന്റണി പെരുമ്പാവൂരും ഉണ്ടായിരുന്നു. മത്സരശേഷം അർജന്റീനിയൻ ആരാധകരുടെ ആഹ്ലാദപ്രകടനങ്ങൾ ഗാലറിയിൽ ഇരുന്ന് വീക്ഷിക്കുന്ന ലാലേട്ടന്റെ വീഡിയോ ആരാധകർക്കിടയിൽ ചർച്ചയായിരുന്നു. ഈ മത്സരം കാണാൻ നടൻ ഫഹദ് ഫാസിലും ഗാലറിയിൽ എത്തിയിരുന്നു.

വരാനിരിക്കുന്ന തിങ്കളാഴ്ച (തിയതി 20) ഇന്ത്യൻ സമയം അർധരാത്രി 12:30-നാണ് ആവേശകരമായ ഫൈനൽ മത്സരം. ന്യൂയോർക്ക് ന്യൂജേഴ്സി സ്റ്റേഡിയത്തിൽ നടക്കുന്ന ഫൈനലിൽ അർജന്റീന സ്പെയിനിനെ നേരിടും.
‘ദൃശ്യം 3’ ആണ് മോഹൻലാലിന്റേതായി ഒടുവിൽ തിയേറ്ററുകളിൽ എത്തിയ ചിത്രം. സമ്മിശ്ര പ്രതികരണങ്ങളാണ് ചിത്രത്തിന് ലഭിച്ചതെങ്കിലും ബോക്സ് ഓഫീസിൽ വലിയ ചലനം സൃഷ്ടിക്കാൻ സിനിമയ്ക്കായി. ആഗോള ബോക്സ് ഓഫീസിൽ നിന്ന് മാത്രം 238 കോടി രൂപയാണ് ചിത്രം സ്വന്തമാക്കിയത്.
തരുൺ മൂർത്തിയുടെ ‘അതിമനോഹരം’ ആണ് ഇനി മോഹൻലാലിന്റേതായി പുറത്തിറങ്ങാനുള്ള പ്രധാന ചിത്രം. ഇതിന്റെ ചിത്രീകരണം പുരോഗമിക്കുകയാണ്. കൂടാതെ ഒരുപിടി ബിഗ് ബജറ്റ് ചിത്രങ്ങളിൽ താരം അതിഥി വേഷത്തിലും എത്തുന്നുണ്ട്.

മോഹൻലാൽ അതിഥി വേഷത്തിലെത്തുന്ന പ്രധാന ചിത്രങ്ങൾ:

തുടക്കം (മകൾ വിസ്മയയുടെ സിനിമാ അരങ്ങേറ്റ ചിത്രം)

ഖലീഫ (പൃഥ്വിരാജ് ചിത്രം)

കത്തനാർ (ജയസൂര്യ ചിത്രം)

ജയിലർ 2 (തമിഴ്)

ഹൈവാൻ (ബോളിവുഡ്)

ഇവയ്ക്ക് പുറമെ, ദിലീഷ് പോത്തന്റെ സംവിധാനത്തിൽ മോഹൻലാൽ നായകനാകുന്ന ‘നെടുങ്കണ്ടം മിറക്കിൾ’ എന്ന ചിത്രവും അടുത്തിടെ പ്രഖ്യാപിച്ചിരുന്നു. സിനിമാ തിരക്കുകളിലേക്ക് മടങ്ങിയെത്തുന്നതിന് മുൻപുള്ള താരത്തിന്റെ ഈ അമേരിക്കൻ അവധിക്കാല ചിത്രങ്ങൾ ആരാധകർക്ക് ഇരട്ടി മധുരമാണ് നൽകുന്നത്.