”മോദിയ്ക്കും, ഇന്ത്യൻ സർക്കാരിനും അകമഴിഞ്ഞ നന്ദി”; യുദ്ധഭൂമിയിൽ നിന്ന് നേപ്പാൾ വംശജരെ രക്ഷിച്ചതിന് ഇന്ത്യയ്ക്ക് നന്ദിയറിയിച്ച് നേപ്പാൾ പ്രധാനമന്ത്രി

കാഠ്മണ്ഡു: ഇന്ത്യയുടെ നയതന്ത്രത്തെ വാനോളം ഉയർത്തുന്നതായിരുന്നു ഓപ്പറേഷൻ ഗംഗ. അത്യധികം തന്ത്രപരമായ നീക്കത്തിലൂടെ പ്രധാനമന്ത്രി നരേന്ദ്രമോദി കൊണ്ടുവന്ന ഓപ്പറേഷൻ ഗംഗ എന്ന ദൗത്യത്തെ ലോകരാഷ്ട്രങ്ങൾ പോലും അഭിനന്ദിച്ചിരുന്നു. ഈ രക്ഷാദൗത്യത്തിലൂടെ ഇന്ത്യാക്കാരെ മാത്രമല്ല മറ്റു രാജ്യങ്ങളിലുളളവരെയും ഇന്ത്യ രക്ഷപ്പെടുത്തിയിരുന്നു. ഇപ്പോഴിതാ യുക്രെയ്‌നിൽ കുടുങ്ങിക്കിടന്ന നേപ്പാൾ വംശജരെ രക്ഷിച്ച് തിരികെ കൊണ്ടുവന്ന ഇന്ത്യയ്‌ക്ക് നന്ദിയറിയിച്ച് രംഗത്തുവന്നിരിക്കുകയാണ് നേപ്പാൾ പ്രധാനമന്ത്രി ഷേർ ബഹാദൂർ ദൂബെ(Nepal PM thanks PM Modi for evacuating 4 Nepali nationals).

നാല് നേപ്പാൾ വംശജരെയാണ് ഇന്ത്യ രക്ഷാദൗത്യത്തിലൂടെ തിരികെ എത്തിച്ചത്. ഇതിന് പ്രധാനമന്ത്രി നരേന്ദ്ര മോദിക്കും കേന്ദ്ര സർക്കാരിനും നന്ദി അറിയിക്കുന്നതായി ഷേർ ബഹാദൂർ പറഞ്ഞു. ഓപ്പറേഷൻ ഗംഗയിലൂടെ യുക്രെയ്‌നിൽ നിന്ന് കേന്ദ്ര സർക്കാർ, പാകിസ്ഥാൻ, ബംഗ്ലാദേശ്, നേപ്പാൾ ഉൾപ്പെടെയുള്ള അയൽ രാജ്യങ്ങളിൽ നിന്നുള്ള വിദ്യാർത്ഥികളെയും രാജ്യത്തെത്തിച്ചിരുന്നു.

സ്വന്തം രാജ്യക്കാരെ എത്തിച്ചതിനൊപ്പമാണ് അയൽ രാജ്യങ്ങൾക്കും ഇന്ത്യ സഹായമായത്. ഇതിനുപിന്നാലെ ബംഗ്ലാദേശ് പ്രധാനമന്ത്രി ഷെയ്ഖ് ഹസീന, നരേന്ദ്രമോദിക്ക് നന്ദിയറിയിക്കുകയും ചെയ്തിരുന്നു. 20,000 ത്തോളം പേരെയാണ് ഇതുവരെ യുക്രെയ്‌നിൽ നിന്നും സുരക്ഷിതമായി ഇന്ത്യ മടക്കിയെത്തിച്ചത്.