ശബരിമല മണ്ഡലകാല തീർത്ഥാടന മുന്നൊരുക്കങ്ങളിൽ സംതൃപ്‌തി; ഡിജിറ്റലൈസേഷൻ ഉൾപ്പെടെ ആധുനികവൽക്കരണവുമായി മുന്നോട്ട് പോകും; അന്യാധീനപ്പെട്ട ക്ഷേത്ര സ്വത്തുക്കൾ തിരിച്ചു പിടിക്കുക മുഖ്യ അജണ്ട; അഡ്വ. പി എസ് പ്രശാന്ത് പുതിയ ദേവസ്വം ബോർഡ് പ്രസിഡന്റായി ചുമതലയേറ്റു

തിരുവനന്തപുരം: തിരുവിതാംകൂർ ദേവസ്വംബോർഡിന്റെ പ്രസിഡന്റായി അഡ്വ. പി എസ് പ്രശാന്ത് സത്യപ്രതിജ്ഞ ചെയ്‌ത്‌ ചുമതലയേറ്റു. അഡ്വ. എ അജികുമാർ ബോർഡംഗമായും ചുമതലയേറ്റു. മുൻ പ്രസിഡന്റ് അഡ്വ. കെ.അനന്തഗോപൻ കാലാവധി പൂർത്തിയാക്കിയതിനെ തുടർന്ന് ഇന്നലെ സ്ഥാനമൊഴിഞ്ഞിരുന്നു. ഇന്ന് രാവിലെ 11:00 മണിക്ക് ദേവസ്വം ബോർഡ് ആസ്ഥാനത്ത് നടന്ന ലളിതമായ ചടങ്ങിലായിരുന്നു സത്യപ്രതിജ്ഞ. തുടർന്ന് ഓഫീസിലെത്തി ചുമതല ഏറ്റെടുത്ത ശേഷം അദ്ദേഹം വാർത്താ ലേഖകരെ കണ്ടു. ഡിജിറ്റലൈസേഷൻ ഉൾപ്പെടെയുള്ള ആധുനികവൽക്കരണത്തിൽ ശ്രദ്ധയൂന്നുമെന്നും. ഭക്തർക്ക് ബുദ്ധിമുട്ടുണ്ടാക്കുന്ന യാതൊന്നും പുതിയ ബോർഡിന്റെ ഭാഗത്ത് നിന്നും ഉണ്ടാകില്ലെന്നും അദ്ദേഹം പറഞ്ഞു. കെ അനന്തഗോപന്റെ നേതൃത്വത്തിലുള്ള ബോർഡ് മാതൃകാപരമായ പ്രവർത്തനം കാഴ്ചവച്ചു. വികസനപ്രവർത്തനങ്ങൾ മുന്നോട്ട് കൊണ്ടുപോകുമെന്നും ബോർഡിന് നിലവിൽ സാമ്പത്തിക പ്രതിസന്ധിയൊന്നുമില്ലെന്നും അദ്ദേഹം കൂട്ടിച്ചേർത്തു.

ദീർഘവീക്ഷണത്തോടെ നിരവധി പദ്ധതികൾ നടപ്പിലാക്കേണ്ട ചുമതലയാണ്. നിലവിലെ കാലാവധി അപര്യാപ്തമാണെന്ന അഭിപ്രായമുണ്ട് പക്ഷെ ഇപ്പോൾ ലഭ്യമായ കാലയളവിൽ കഴിയാവുന്നത്ര പ്രവർത്തനങ്ങൾ നടത്തുകയാണ് ലക്‌ഷ്യം. ശബരിമല മണ്ഡലകാലം ആരംഭിക്കാൻ പോകുന്ന സാഹചര്യത്തിൽ മുന്നൊരുക്കങ്ങളെ കുറിച്ച് ആത്മവിശ്വാസമുണ്ട്. കാര്യങ്ങൾ നേരിട്ട് വിലയിരുത്താനായി വരും ദിവസങ്ങളിൽ തന്നെ സന്നിധാനത്തേക്ക് പോകും. വരുമാനം കുറഞ്ഞ ക്ഷേത്രങ്ങളുടെ വികസന പ്രവർത്തനങ്ങൾക്ക് തടസ്സം വരാതിരിയ്ക്കാൻ പദ്ധതി ആവിഷ്കരിക്കുമെന്നും. അന്യാധീനപ്പെട്ട ക്ഷേത്ര ഭൂമി തിരിച്ചു പിടിക്കൽ ഒരു മുഖ്യ അജണ്ടയായി കണക്കാക്കി ഊർജ്ജിതമായ ശ്രമങ്ങൾ നടത്തുമെന്നും അദ്ദേഹം തത്വമയി ന്യൂസിനോട് പറഞ്ഞു.