മുഴപ്പിലങ്ങാട് വിതുമ്പി ; നിഹാലിന്റെ മൃതദേഹം കബറടക്കി

മുഴപ്പിലങ്ങാട് : തെരുവുനായ്ക്കളുടെ ആക്രമണത്തിൽ മരിച്ച നിഹാലിന് ജന്മനാട് വിട നൽകി. വൻ ജനാവലിയുടെ സാന്നിധ്യത്തിൽ എടക്കാട് മണപ്പുറം ജുമാമസ്ജിദ്ദ് ഖബർസ്ഥാനിൽ മൃതദേഹം കബറടക്കി. നിഹാലിന്റെ മൃതദേഹത്തിന് ആദരാഞ്ജലികൾ അർപ്പിക്കാൻ മുഴപ്പിലങ്ങാട് കെട്ടിലകം പള്ളിക്ക് സമീപമുള്ള ദാറുൽ റഹ്മ വീട്ടിലേക്ക് ആയിരങ്ങളാണ് ഒഴുകിയെത്തിയത്.

മന്ത്രി വി.എൻ.വാസവൻ, രാമചന്ദ്രൻ കടന്നപ്പള്ളി എംഎൽഎ, മേയർ ടി.ഒ.മോഹനൻ, സിപിഎം ജില്ലാ സെക്രട്ടറി എം.വി.ജയരാജൻ, ജനാധിപത്യ മഹിളാ അസോസിയേഷൻ അഖിലേന്ത്യാ പ്രസിഡന്റ് പി.കെ.ശ്രീമതി, ജില്ലാ പഞ്ചായത്ത് പ്രസിഡന്റ് പി.പി.ദിവ്യ തുടങ്ങിയവർ നിഹാലിന് ആദരാഞ്ജലികൾ അർപ്പിക്കാനെത്തി. തെരുവുനായ ശല്യം പരിഹരിക്കാത്ത അധികൃതരുടെ നിസ്സംഗതയെക്കുറിച്ച് പറഞ്ഞ് ജനം വീട്ടിലെത്തിയ ജനപ്രതിനിധികളോട് രോഷം പ്രകടിപ്പിച്ചു.

ബാലാവകാശ കമ്മിഷൻ ചെയർമാൻ കെ.വി.മനോജ് കുമാർ നിഹാലിന്റെ വീട്ടിൽ എത്തിയപ്പോഴും ജനങ്ങൾ പ്രതിഷേധം അറിയിച്ചു. തെരുവുനായ ശല്യവുമായി ബന്ധപ്പെട്ട് സുപ്രീം കോടതിയുടെ പരിഗണനയിലുള്ള കേസിൽ കമ്മിഷൻ കക്ഷി ചേരുമെന്ന് അദ്ദേഹം അറിയിച്ചു. സംഭവത്തിൽ മനുഷ്യാവകാശ കമ്മിഷനും സ്വമേധയാ കേസെടുത്തിട്ടുണ്ട്. സംഭവത്തെക്കുറിച്ച് 15 ദിവസത്തിനുള്ളിൽ വിശദമായ റിപ്പോർട്ട് സമർപ്പിക്കാൻ മുഴപ്പിലങ്ങാട് പഞ്ചായത്ത് സെക്രട്ടറിയോട് കമ്മിഷൻ ജുഡീഷ്യൽ അംഗം കെ.ബൈജുനാഥ് നിർദേശിച്ചു. അടുത്ത മാസം കണ്ണൂർ ഗവ. ഗസ്റ്റ് ഹൗസിൽ നടക്കുന്ന സിറ്റിങ്ങിൽ കേസ് പരിഗണിക്കുമെന്നും അദ്ദേഹം അറിയിച്ചു.

ഇന്നലെയാണ് മുഴപ്പിലങ്ങാട് കെട്ടിനകത്ത് ദാറുൽ റഹ്‌മയിൽ നിഹാൽ നൗഷാദ് (11) തെരുവുനായ്ക്കളുടെ ആക്രമണത്തിൽ കൊല്ലപ്പെട്ടത്. ഓട്ടിസമുള്ള നിഹാലിന് സംസാരശേഷി കുറവായിരുന്നു. ഇന്നലെ വൈകുന്നേരം അഞ്ചരമുതൽ കുട്ടിയെ കാണാനില്ലായിരുന്നു. തുടർന്ന് നടത്തിയ തിരച്ചിലിലാണ് രാത്രി എട്ട് മണിയോടെ വീട്ടിൽ നിന്ന് 300 മീറ്റർ അകലെയുള്ള ആൾപ്പാർപ്പില്ലാത്ത വീടിന്റെ പിൻഭാഗത്ത് മൃതദേഹം കണ്ടെത്തിയത്.കുട്ടിയുടെ ശരീരം മുഴുവൻ തെരുവുനായ്ക്കൾ കടിച്ചുപറിച്ചിട്ടുണ്ട്. വീട്ടിൽനിന്ന് ഇറങ്ങിയ കുട്ടിയുടെ പിന്നാലെ തെരുവ് നായകൾ ഓടിയപ്പോൾ കുട്ടി ഭയപ്പെട്ട് സമീപത്തെ വീട്ടിലേക്ക് ഓടിപ്പോയതാകാമെന്നും തുടർന്ന് നായകൾ ആക്രമിച്ചതാകാമെന്നുമാണ് കരുതുന്നത്.