ഇടിമിന്നലേറ്റ് ബിഹാറില്‍ 33 മരണം: അനുശോചനമറിയിച്ച്‌ മുഖ്യമന്ത്രി നിതീഷ് കുമാര്‍

പാട്ന: ബിഹാറില്‍ ഇടിമിന്നലേറ്റ് മരിച്ചത് 33 പേര്‍. ഈ കാലവര്‍ഷത്തിനിടയില്‍ സംസ്ഥാനത്ത് ആകെ മൊത്തം മരണം സംഭവിച്ചവരുടെ കണക്കാണ് ഇത്.

സമൂഹമാധ്യമമായ ട്വിറ്ററില്‍, ബിഹാര്‍ മുഖ്യമന്ത്രി നിതീഷ് കുമാറാണ് ഈ കണക്കുകള്‍ പുറത്തു വിട്ടിരിക്കുന്നത്. മരണമടഞ്ഞവരുടെ കുടുംബങ്ങള്‍ക്ക് 4 ലക്ഷം രൂപ വീതം നഷ്ടപരിഹാരം പ്രഖ്യാപിച്ചിട്ടുണ്ട്. ജനങ്ങളോട് അനാവശ്യമായി പുറത്തിറങ്ങാതിരിക്കാനും സദാ ജാഗ്രത പുലര്‍ത്താനും മുഖ്യമന്ത്രി അഭ്യര്‍ത്ഥിച്ചു.

അപകടങ്ങളുടെ കണക്കുകള്‍ അറിഞ്ഞ പ്രധാനമന്ത്രി നരേന്ദ്ര മോദിയും മരണങ്ങളില്‍ അനുശോചനം രേഖപ്പെടുത്തി. മരണമടഞ്ഞവരുടെ വേര്‍പാട് താങ്ങാന്‍ അവരുടെ കുടുംബങ്ങള്‍ക്ക് ദൈവം ശക്തി നല്‍കട്ടെയെന്ന് പ്രാര്‍ത്ഥിച്ച അദ്ദേഹം, തദ്ദേശ ഭരണകൂടം രക്ഷാ പ്രവര്‍ത്തനങ്ങളില്‍ ഏര്‍പ്പെട്ടിരിക്കുന്ന കാര്യവും കുറിപ്പില്‍ പരാമര്‍ശിച്ചു.