കുഞ്ചാക്കോ ബോബൻ ചിത്രം ‘ന്നാ താൻ കേസ് കൊട്’ 50 കോടി ക്ലബ്ബിൽ ; തിയറ്ററുകളിൽ വിജയകരമായി യാത്ര തുടർന്ന് ചിത്രം; പ്രതിസന്ധികളെ അതിജീവിച്ച് നേടിയ വിജയം

എറണാകുളം: 50 കോടി ക്ലബ്ബിൽ ഇടം നേടി കുഞ്ചാക്കോ ബോബൻ ചിത്രം ‘ന്നാ താൻ കേസ് കൊട് ’. ഫേസ്ബുക്കിലൂടെ സന്തോഷ വാർത്ത പങ്കുവെച്ച് താരം . ഈ മാസം 11 ന് റിലീസ് ചെയ്ത ചിത്രം വിജയകരമായി മുന്നേറുന്നു.

50 കോടി അടിച്ചേ എന്ന് എഴുതിയ പോസ്റ്ററിനൊപ്പമാണ് കുഞ്ചാക്കോ ബോബൻ ചിത്രം 50 കോടിയുടെ നേട്ടം സ്വന്തമാക്കിയതായി അറിയിച്ചത്. സിനിമയെ ഇരുകയ്യും നീട്ടി സ്വീകരിച്ച പ്രേക്ഷകർക്ക് താരം ഫേസ്ബുക്കിലൂടെ നന്ദി പറഞ്ഞു. പ്രേക്ഷക പിന്തുണയുള്ളതുകൊണ്ടാണ് ചിത്രം വിജയിച്ചതെന്നും താരം പറഞ്ഞു .

‘ന്നാ താൻ കേസ് കൊട്’ ഒരു വലിയ വിജയമാക്കിയ പ്രേഷകർക്ക് നന്ദി. നിങ്ങളുടെ സ്നേഹവും പിന്തുണയും വലിയ അത്ഭുതമാണ് സൃഷ്ടിച്ചത്. ‘ ന്നാ താൻ കേ് കൊട്’ 50 കോടി പിന്നിട്ടിരിക്കുന്നു’വെന്നും കുഞ്ചാക്കോ ബോബൻ ഫേസ്ബുക്കിൽ കുറിച്ചു.

റിലീസ് ദിനത്തൽ തന്നെ വിവാദങ്ങൾ സൃഷ്‌ടിച്ച ചിത്രമായിരുന്നു ‘ ന്നാ താൻ കേസ് കൊട്’ . റോഡിലെ കുഴിയെക്കുറിച്ച് സിനിമയുടെ പോസ്റ്ററിൽ പരാമർശിച്ചതിനെ തുടർന്ന് രൂക്ഷമായ സൈബർ ആക്രമണമായിരുന്നു സിനിമയ്‌ക്കും കുഞ്ചാക്കോ ബോബനുമെതിരെ ഉണ്ടായത്. എന്നാൽ പ്രതിസന്ധികളെ അതിജീവിച്ച് ആദ്യ ദിനം തന്നെ സിനിമയ്ക്ക് വളരെ നല്ല അഭിപ്രായമാണ് ലഭിച്ചത്.