ഇനി നിങ്ങളുടെ ഒരു സഹായവും വേണ്ട ! ഹൈവേ നിർമ്മാണം ഞങ്ങൾ ഒറ്റയ്ക്ക് പൂർത്തിയാക്കും ; ചൈനയുടെ വാഗ്ദാനം നിഷേധിച്ച് നേപ്പാൾ

കാഠ്മണ്ഡു : വികസന പദ്ധതിയ്ക്കായി ചൈനീസ് സർക്കാർ വാഗ്ദാനം ചെയ്ത സഹായം നിഷേധിച്ച് നേപ്പാൾ. അരനികോ ഹൈവേ നിർമ്മാണവുമായി ബന്ധപ്പെട്ട് ചൈന നൽകിയ വാഗ്ദാനമാണ് നേപ്പാൾ പരസ്യമായി വേണ്ടെന്നു തുറന്നടിച്ചിരിക്കുന്നത്. ചൈന സഹായം വൈകിപ്പിച്ച പശ്ചാത്തലത്തിലാണ് നേപ്പാളിന്റെ തീരുമാനം.

നേപ്പാൾ- ചൈന അതിർത്തിയ്ക്ക് സമീപം കാഠ്മണ്ഡുവിനെയും കോദാരിയെയും ബന്ധിപ്പിച്ച് കൊണ്ടാണ് ഹൈവേ നിർമ്മാണം നടക്കുന്നത്. 2015 ലായിരുന്നു ചൈനീസ് പ്രസിഡന്റ് ഷി ജിൻപിംഗ് നിർമ്മാണ പ്രവർത്തനങ്ങൾക്കായി സഹായം നൽകാമെന്ന് നേപ്പാളിനെ അറിയിച്ചത്. ചൈനയെ വിശ്വസിച്ച നേപ്പാൾ ഇത് പ്രകാരം ഹൈവേയുടെ നിർമ്മാണവും ആരംഭിച്ചു. സാമ്പത്തിക, സാങ്കേതിക സഹായം നൽകാമെന്നായിരുന്നു ചൈനയുടെ വാഗ്ദാനം. ചൈനയെയും ബന്ധിപ്പിക്കുന്ന 115 കിലോ മീറ്റർ ഹൈവേയ്ക്ക് 123 മില്യൺ ഡോളർ നൽകാമെന്നായിരുന്നു ചൈന പറഞ്ഞത്.

അതേസമയം, 1960 കളിൽ അരനികോ ഹൈവേയുടെ ചെറിയൊരു ഭാഗം ചൈനീസ് സർക്കാർ നിർമ്മിച്ചിരുന്നു. എന്നാൽ 2015 ൽ ഉണ്ടായ ഭൂചലനത്തിൽ ഈ റോഡ് തകർന്നു. ഇതിന്റെ പശ്ചാത്തലത്തിലാണ് തുടർ നിർമ്മാണത്തിൽ തങ്ങളും പങ്കാളികളാകുന്നുവെന്ന് ചൈന നേപ്പാളിനെ അറിയിച്ചത്. ഇതിന് പിന്നാലെ നിർമ്മാണ പ്രവർത്തനങ്ങൾക്കായി നേപ്പാൾ സർക്കാർ 3.6 ബില്യൺ ഡോളർ ബജറ്റിൽ അനുവദിക്കുകയും നിർമ്മാണ പ്രവർത്തനങ്ങൾ ആരംഭിക്കുകയും ചെയ്തു. എന്നാൽ വാഗ്ദാനം ചെയ്ത തുക ചൈനീസ് സർക്കാർ നൽകിയില്ല. നിരവധി തവണ സഹായം ആവശ്യപ്പെട്ടെങ്കിലും ഓരോ കാരണങ്ങൾ പറഞ്ഞ് ചൈന നേപ്പാളിനെ ഒഴിവാകുകയായിരുന്നു. ഇതോടെയാണ് ചൈനയുടെ സഹായം ഇനി വേണ്ടെന്ന് നേപ്പാൾ പരസ്യമായി അറിയിച്ചത്.