2007 ജനുവരി 1-ന് ശേഷം ജനിച്ചവർക്ക് പുകയില ഉൽപ്പന്നങ്ങൾ വിൽക്കരുത്! മാലിദ്വീപിൽ പുതിയ നിയമം പ്രാബല്യത്തിൽ; വിനോദസഞ്ചാരികൾക്കും ബാധകം

2007 ജനുവരി 1-ന് ശേഷം ജനിച്ചവർ പുകയില ഉൽപ്പന്നങ്ങൾ ഉപയോഗിക്കുന്നത് നിരോധിച്ച് മാലിദ്വീപ്. പുതിയ നിയമം ഇന്ന് മുതൽ പ്രാബല്യത്തിൽ വന്നു. രാജ്യത്ത് എത്തുന്ന വിനോദ സഞ്ചാരികൾക്കും ഈ നിയമം ബാധകമായിരിക്കും.

പുകയില ഉപയോഗത്തിന് തലമുറപരമായ നിരോധനം നടപ്പിലാക്കിയ ലോകത്തിലെ ഏക രാജ്യമായി മാലദ്വീപ് ഔദ്യോഗികമായി മാറിയതായി ആരോഗ്യ മന്ത്രാലയം പ്രഖ്യാപിച്ചു. പ്രസിഡൻ്റ് മുഹമ്മദ് മുയിസുവിന്റെ പൊതുജനാരോഗ്യ സംരംഭങ്ങളുടെ ഭാഗമായാണ് ഈ നിരോധനം. 2007-ലോ അതിനുശേഷമോ ജനിച്ചവർക്ക് രാജ്യത്ത് പുകയില ഉൽപ്പന്നങ്ങൾ വാങ്ങുന്നതിനോ, ഉപയോഗിക്കുന്നതിനോ, വിൽക്കുന്നതിനോ വിലക്ക് ഏർപ്പെടുത്തുന്നതാണ് പുതിയ നിയമം. പുതിയ വ്യവസ്ഥ പ്രകാരം, 2007 ജനുവരി 1-നോ അതിനുശേഷമോ ജനിച്ച വ്യക്തികൾക്ക് മാലിദ്വീപിനുള്ളിൽ പുകയില ഉൽപ്പന്നങ്ങൾ വാങ്ങുന്നതിനോ, ഉപയോഗിക്കുന്നതിനോ,വിൽക്കുന്നതിനോ വിലക്കുണ്ട്,” ആരോഗ്യ മന്ത്രാലയം ഒരു പ്രസ്താവനയിൽ അറിയിച്ചു.

പുതിയ നിയമം നിലവിൽ വന്നതോടെ, കച്ചവടക്കാർ വിൽപ്പനയ്ക്ക് മുമ്പ് ഉപഭോക്താവിൻ്റെ പ്രായം പരിശോധിക്കേണ്ടതുണ്ടെന്ന് ആരോഗ്യ മന്ത്രാലയത്തിൻ്റെ പ്രസ്താവനയിൽ പറയുന്നു. നിരോധനം എല്ലാത്തരം പുകയില ഉൽപ്പന്നങ്ങൾക്കും ബാധകമാണ്, കൂടാതെ വിൽപ്പനക്കാർ വിൽപ്പനയ്ക്ക് മുമ്പ് പ്രായം ഉറപ്പാക്കണം. ഈ നടപടി പൊതുജനാരോഗ്യം സംരക്ഷിക്കുന്നതിനും പുകയില രഹിത തലമുറയെ പ്രോത്സാഹിപ്പിക്കുന്നതിനും ലക്ഷ്യമിട്ടുള്ളതാണെന്നും മന്ത്രാലയം കൂട്ടിച്ചേർത്തു.

സിഗരറ്റുകൾ ഉൾപ്പെടെയുള്ള എല്ലാ പുകയില ഉൽപ്പന്നങ്ങളെയും, പുകയില്ലാത്ത പുകയില ഉൽപ്പന്നങ്ങളെയും നിരോധനം ബാധിക്കുമെന്ന് അധികൃതർ അറിയിച്ചു. കൂടാതെ, എല്ലാ പ്രായക്കാർക്കും ഇലക്ട്രോണിക് സിഗരറ്റുകൾ ഇറക്കുമതി ചെയ്യുന്നതിനും വിൽക്കുന്നതിനും ഉപയോഗിക്കുന്നതിനും രാജ്യത്ത് നിലവിൽ പൂർണ്ണമായ നിരോധനം ഉണ്ടെന്നും മാലിദ്വീപ് ചൂണ്ടിക്കാട്ടി.

പുതിയ നിയന്ത്രണങ്ങൾ ലംഘിക്കുന്നവർക്ക് കനത്ത പിഴയാണ് ചുമത്തുന്നത്. പ്രായപൂർത്തിയാകാത്തവർക്ക് പുകയില വിൽക്കുന്ന കടയുടമകൾക്ക് 50,000 മാലിദ്വീപ് റുഫിയ (ഏകദേശം $3,200) പിഴ ചുമത്തും. 2022-ൽ സമാനമായ തലമുറപരമായ പുകവലി നിരോധനം പാസാക്കിയ ന്യൂസിലാൻഡ്, പുതിയ സർക്കാർ വന്നതിനെ തുടർന്ന് ഒരു വർഷത്തിനുള്ളിൽ അത് റദ്ദാക്കുകയുണ്ടായി. 2009-ന് ശേഷം ജനിച്ച ആർക്കും പുകയില വിൽക്കുന്നത് നിരോധിക്കുന്നതിന് സമാനമായ ഒരു നിയമം യുകെ നിർദ്ദേശിച്ചെങ്കിലും അത് ഇപ്പോഴും പാർലമെൻ്റിൽ ചർച്ചയിലാണ്.