തിരുവനന്തപുരം മണ്ഡലത്തിലെ എൻഡിഎ സ്ഥാനാർത്ഥി രാജീവ് ചന്ദ്രശേഖറിന്റെ തെരഞ്ഞെടുപ്പ് പ്രചാരണ ഗാനം അവതരിപ്പിച്ചു. ഇനി കാര്യം നടക്കും എന്ന മുദ്രാവാക്യത്തിലൂന്നിയാണ് ഗാനത്തിലെ വരികൾ ചിട്ടപ്പെടുത്തിയിരിക്കുന്നത്.
വാഗ്ദാനങ്ങൾ വാക്കിലൊതുക്കാതെ നടപ്പിലാക്കി കാണിക്കുന്ന പെർഫോമൻസ് രാഷ്ട്രീയത്തിലൂടെ പുരോഗതിയുടെ പുത്തൻ പാതയിലേക്ക് തിരുവനന്തപുരത്തെ നയിക്കാനുള്ള പുതിയ നായകനായി രാജീവ് ചന്ദ്രശേഖറിനെ അവതരിപ്പിക്കുകയാണ് ഗാനത്തിലെ ഓരോ വരികളും.
സന്തോഷ് വർമയുടെ വരികൾക്ക് സംഗീതം നൽകി ആലപിച്ചത് അനിൽ ജോൺസൺ. രാഷ്ട്രീയ നേതാവ്, സന്നദ്ധപ്രവർത്തകൻ, സംരംഭകൻ, ടെക്നോളജി വിദഗ്ധൻ എന്നീ വിവിധ മേഖലകളിലൂടെ പൊതുജനങ്ങളിലേക്ക് നേരിട്ട് സന്ദേശമെത്തിക്കുന്ന തരത്തിലാണ് ഈ തീം ഗാനം അണിയിച്ചൊരുക്കിയിരിക്കുന്നത്. സംഗീതത്തിനൊപ്പം രാജീവ് ചന്ദ്രശേഖറുടെ തിരക്കിട്ട പ്രചാരണ പരിപാടികളിൽ നിന്നുള്ള ദൃശ്യങ്ങളും ഉൾപ്പെടുത്തിയിട്ടുണ്ട്. സമൂഹ മാദ്ധ്യമങ്ങളിൽ ഗാനം അതിവേഗം ഷെയർ ചെയ്യപ്പെടുകയാണ്.
