ഒന്‍പതുകാരിയുടെ വയറ്റില്‍ നിന്ന് ഒരു കിലോ മുടി പുറത്തെടുത്തു. കുട്ടിയ്ക്ക് നൂറില്‍ താഴെ ആളുകളില്‍ മാത്രം റിപ്പോര്‍ട്ട് ചെയ്യപ്പെട്ടിട്ടുള്ള അപൂര്‍വ രോഗം

തിരുവനന്തപുരം: തുടര്‍ച്ചയായ വയറുവേദനയെ തുടര്‍ന്ന് നിംസ് മെഡിസിറ്റിയില്‍ ചികിത്സ തേടിയ ഒന്‍പതുകാരിയുടെ വയറ്റില്‍ നിന്ന് ശസ്ത്രക്രിയയിലൂടെ പുറത്തെടുത്തത് ഒരു കിലോ തൂക്കം വരുന്ന തലമുടിക്കെട്ട്. ആശുപത്രിയിലെ പീഡിയാട്രിക് സര്‍ജറി വിഭാഗം സീനിയര്‍ കണ്‍സള്‍ട്ടന്റ് ഡോ. ബിജു ഐ.ജി. നായരുടെ നേതൃത്വത്തിലുള്ള ഡോക്ടര്‍മാരുടെ സംഘമാണ് ഈ അപൂര്‍വ്വ ശസ്ത്രക്രിയ വിജയകരമായി പൂര്‍ത്തിയാക്കിയത്.

തുടര്‍ച്ചയായ വയറുവേദനയും ഛര്‍ദിയുമായാണ് കുട്ടിയെ ആശുപത്രിയില്‍ പ്രവേശിപ്പിച്ചത്. അള്‍ട്രാസൗണ്ട്, സി.ടി. സ്‌കാന്‍ പരിശോധനകളില്‍ കുടലില്‍ ഗുരുതരമായ തടസ്സമുള്ളതായി കണ്ടെത്തി. ശസ്ത്രക്രിയയ്ക്ക് മുന്നോടിയായുള്ള എന്‍ഡോസ്‌കോപ്പിയില്‍ ആമാശയത്തിലും ചെറുകുടലിലുമായി വലിയ തലമുടിക്കെട്ട് അടിഞ്ഞുകൂടിയതായി സ്ഥിരീകരിച്ചു. നൂറില്‍ താഴെ ആളുകളില്‍ മാത്രം റിപ്പോര്‍ട്ട് ചെയ്യപ്പെട്ടിട്ടുള്ള ‘റപുന്‍സല്‍ സിന്‍ഡ്രോം’ (Rapunzel Syndrome) എന്ന അപൂര്‍വവും സങ്കീര്‍ണവുമായ രോഗമാണിതെന്ന് ഡോക്ടര്‍മാര്‍ വ്യക്തമാക്കി.

മാനസികസമ്മര്‍ദമോ അരക്ഷിതാവസ്ഥയോ കാരണം കുട്ടികള്‍ സ്വന്തം മുടി പറിച്ച് വിഴുങ്ങുന്ന ശീലത്തിലൂടെയാണ് ‘ട്രൈക്കോബെസോര്‍’ (Trichobezoar) എന്ന ഈ അവസ്ഥയുണ്ടാകുന്നത്. മാസങ്ങളോളം ആമാശയത്തില്‍ കിടക്കുന്ന മുടി ദഹിക്കാതെ കട്ടിയുള്ള തടസ്സമായി മാറുകയാണ് ചെയ്യുന്നത്. സങ്കീര്‍ണമായ ശസ്ത്രക്രിയയിലൂടെ ആമാശയത്തില്‍നിന്നും ചെറുകുടലില്‍നിന്നും മുടിയുടെ കെട്ട് പൂര്‍ണമായും നീക്കം ചെയ്തു. നിലവില്‍ ആരോഗ്യവതിയായ കുട്ടി സാധാരണ നിലയില്‍ ഭക്ഷണവും മറ്റും കഴിച്ചുതുടങ്ങിയെന്നും പൂര്‍ണസുഖം പ്രാപിച്ച് വീട്ടിലേക്ക് മടങ്ങിയെന്നും ആശുപത്രി അധികൃതര്‍ അറിയിച്ചു.

കുട്ടികളില്‍ കാണപ്പെടുന്ന ഇത്തരം അസാധാരണ ശീലങ്ങളും മാനസിക ബുദ്ധിമുട്ടുകളും തുടക്കത്തില്‍ തന്നെ തിരിച്ചറിഞ്ഞ് കൗണ്‍സിലിംഗും വൈദ്യസഹായവും നല്‍കാന്‍ മാതാപിതാക്കള്‍ ശ്രദ്ധിക്കേണ്ടതാണ്.