ദില്ലി: ഒക്ടോബര്‍ 15ന് സ്കൂള്‍ തുറക്കുന്നത് സംബന്ധിച്ച ഉത്തരവില്‍ വ്യക്തതയുമായി കേന്ദ്രആഭ്യന്തര മന്ത്രാലയം. സ്കൂള്‍ തുറക്കുന്നത് നിര്‍ബന്ധമല്ലെന്ന് പുതിയ ഉത്തരവില്‍ വ്യക്തമാക്കുന്നു. ഒക്ടോബര്‍ 15 മുതല്‍ സ്കുളുകള്‍ക്കും കോച്ചിങ് സെന്‍ററുകള്‍ക്കും തുറന്ന് പ്രവര്‍ത്തിക്കാന്‍ കേന്ദ്രസര്‍ക്കാര്‍ അനുമതി നല്‍കിയിരുന്നു. അണ്‍ലോക്ക് 5-ന്റെ ഭാഗമായാണ് സ്കൂളുകളുടെ പ്രവര്‍ത്തനത്തിന് ഇളവ് അനുവദിച്ചത്. എന്നാല്‍, ഇക്കാര്യത്തില്‍ അന്തിമ തീരുമാനം സംസ്ഥാനങ്ങള്‍ക്ക് എടുക്കാമെന്നും വ്യക്തമാക്കിയിരുന്നു.
സ്കൂള്‍ അധികൃതരുമായി കൂടിയാലോചിച്ച്‌ കൊവിഡ് സ്ഥിതി വിലയിരുത്തി മാത്രം ഇക്കാര്യത്തില്‍ തീരുമാനമെടുക്കണമെന്നായിരുന്നു ആഭ്യന്തര മന്ത്രാലയത്തിന്റെ ഉത്തരവ്. എന്നാല്‍ ഉത്തരവിന്റെ ചുവടുപിടിച്ച്‌ പല സംസ്ഥാനങ്ങളും സ്കൂളുകള്‍ തുറക്കാനുള്ള ഒരുക്കത്തിലാണ്. സ്കൂളുകള്‍ തുറക്കുമെന്ന് ഉത്തരാഖണ്ഡ് പ്രഖ്യാപിച്ചിട്ടുണ്ട്. കര്‍ണാടകയും ഇതുമായി ബന്ധപ്പെട്ട ചര്‍ച്ചകളുമായി മുന്നോട്ട് പോവുകയാണ്. അതേസമയം കേരളം ഉടന്‍ തുറക്കില്ലെന്ന നിലപാടാണ് സ്വീകരിച്ചത്
