സംസ്ഥാനത്ത് മയക്കുമരുന്ന് വിപണനം തടയുന്നതിനായുള്ള ‘ഓപ്പറേഷന് ഡി-ഹണ്ടി’ന്റെ ഭാഗമായി കഴിഞ്ഞ ദിവസം സംസ്ഥാനവ്യാപകമായി നടത്തിയ സ്പെഷ്യല് ഡ്രൈവില് 101 പേര് പിടിയിലായി. മയക്കുമരുന്ന് വില്പ്പനയില് ഏര്പ്പെടുന്നതായി സംശയിക്കുന്ന 1803 പേരെ പരിശോധിച്ചു. ഇതില് 91 കേസുകളാണ് രജിസ്റ്റര് ചെയ്തത്. മാരക മയക്കുമരുന്നുകളായ എം.ഡി.എം.എ (0.00071 കി.ഗ്രാം), കഞ്ചാവ് (0.14864 കി.ഗ്രാം), കഞ്ചാവ് ബീഡി (63 എണ്ണം) എന്നിവ പോലീസ് ഇവരില് നിന്ന് പിടിച്ചെടുത്തു.
നിരോധിത മയക്കുമരുന്നുകളുടെ സംഭരണത്തിലും വിപണനത്തിലും ഏര്പ്പെടുന്നവരെ കണ്ടെത്താനും നിയമനടപടി സ്വീകരിക്കാനുമാണ് സംസ്ഥാനത്ത് ‘ഓപ്പറേഷന് ഡി-ഹണ്ട്’ ശക്തമാക്കിയിരിക്കുന്നത്.
മയക്കുമരുന്ന് സംബന്ധിച്ച വിവരങ്ങള് അറിയിക്കുന്നതിനായി 24 മണിക്കൂറും പ്രവര്ത്തിക്കുന്ന ആന്റി നര്ക്കോട്ടിക്ക് കണ്ട്രോള് റൂം (9497927797) നിലവിലുണ്ട്. ഈ നമ്പറിലേക്ക് വിളിക്കുന്നവരുടെ വിവരങ്ങള് രഹസ്യമായി സൂക്ഷിക്കുമെന്നും പോലീസ് അറിയിച്ചു.
മയക്കുമരുന്നിനെതിരെയുള്ള നടപടികള് ശക്തമാക്കുന്നതിന്റെ ഭാഗമായി ക്രമസമാധാന വിഭാഗം എ.ഡി.ജി.പിയുടെ നേരിട്ടുള്ള മേല്നോട്ടത്തില് സംസ്ഥാന തലത്തില് ആന്റി നര്ക്കോട്ടിക്സ് ഇന്റലിജന്സ് സെല്ലും എന്.ഡി.പി.എസ് കോര്ഡിനേഷന് സെല്ലും റേഞ്ച് അടിസ്ഥാനത്തില് ആന്റി നര്ക്കോട്ടിക്സ് ഇന്റലിജന്സ് സെല്ലും പ്രവര്ത്തിക്കുന്നുണ്ട്.
