ഓപ്പറേഷൻ സിന്ദൂർ ഭയമില്ലാത്ത ഭാരതത്തിന്റെ താക്കീത്; ഏത് വലിയ യുദ്ധത്തിനും രാജ്യം സജ്ജമെന്ന് രാജ്‌നാഥ് സിംഗ്

ദില്ലി : ഭീകരതയ്‌ക്കെതിരെ ഭാരതം നടത്തിയ ‘ഓപ്പറേഷൻ സിന്ദൂർ’ തങ്ങളുടെ നിബന്ധനകൾക്ക് വിധേയമായി സ്വമേധയാ നിർത്തിയതാണെന്നും, ആവശ്യമെങ്കിൽ പാകിസ്ഥാനുമായി ഒരു നീണ്ട യുദ്ധത്തിന് ഇന്ത്യ പൂർണ്ണ സജ്ജമായിരുന്നുവെന്നും പ്രതിരോധ മന്ത്രി രാജ്‌നാഥ് സിംഗ്. ദേശീയ സുരക്ഷാ ഉച്ചകോടിയിൽ സംസാരിക്കവെ, പാകിസ്ഥാനെ അന്താരാഷ്ട്ര ഭീകരതയുടെ പ്രഭവകേന്ദ്രമെന്ന് വിശേഷിപ്പിച്ച അദ്ദേഹം, ഭീകരവാദത്തിന്റെ രാഷ്ട്രീയവും പ്രത്യയശാസ്ത്രപരവുമായ വേരുകൾ പിഴുതെറിയേണ്ടത് അത്യന്താപേക്ഷിതമാണെന്ന് വ്യക്തമാക്കി.

പ്രധാനമന്ത്രി നരേന്ദ്രമോദിയുടെ നേതൃത്വത്തിലുള്ള ‘സീറോ ടോളറൻസ് പോളിസി’യെ പ്രകീർത്തിച്ച പ്രതിരോധ മന്ത്രി, ആണവാക്രമണം നടത്തുമെന്ന പാകിസ്ഥാന്റെ ഭീഷണിയെ ഇന്ത്യ വെറും തട്ടിപ്പായി തള്ളിക്കളഞ്ഞതായും കൂട്ടിച്ചേർത്തു. കഴിഞ്ഞ വർഷം പഹൽഗാമിൽ 26 പേരുടെ ജീവനെടുത്ത ഭീകരാക്രമണത്തിന് മറുപടിയായാണ് 2025 മെയ് 7-ന് ഇന്ത്യ ‘ഓപ്പറേഷൻ സിന്ദൂർ’ ആരംഭിച്ചത്. പാകിസ്ഥാനിലും പാക് അധീന കശ്മീരിലുമായി പ്രവർത്തിച്ചിരുന്ന ലഷ്കർ-ഇ-തൊയ്ബ, ജെയ്‌ഷെ മുഹമ്മദ്, ഹിസ്ബുൾ മുജാഹിദ്ദീൻ എന്നിവയുടെ ഒമ്പത് പ്രധാന ഭീകര ലോഞ്ച് പാഡുകൾ ഇന്ത്യൻ സൈന്യം തകർത്തു. ഈ സൈനിക നടപടിയിൽ നൂറിലധികം ഭീകരരെ വധിക്കാൻ ഇന്ത്യക്ക് സാധിച്ചു. പാകിസ്ഥാൻ ഡ്രോൺ ആക്രമണങ്ങളിലൂടെയും ഷെല്ലാക്രമണങ്ങളിലൂടെയും തിരിച്ചടിക്കാൻ ശ്രമിച്ചതോടെ നാല് ദിവസം നീണ്ട കടുത്ത സംഘർഷമാണ് ഇരുരാജ്യങ്ങൾക്കുമിടയിൽ നിലനിന്നത്. ഇന്ത്യ നടത്തിയ പ്രത്യാക്രമണത്തിൽ ലാഹോറിലെയും ഗുജ്‌റൻവാലയിലെയും റഡാർ സംവിധാനങ്ങൾ തകർക്കപ്പെട്ടു. വൻ നാശനഷ്ടങ്ങൾ നേരിട്ടതിനെത്തുടർന്ന് പാകിസ്ഥാൻ ഡയറക്ടർ ജനറൽ ഓഫ് മിലിട്ടറി ഓപ്പറേഷൻസ് ഇന്ത്യൻ അധികൃതരെ ബന്ധപ്പെടുകയും മെയ് 10-ന് വെടിനിർത്തൽ പ്രഖ്യാപിക്കുകയുമായിരുന്നു.

ഭീകരതയ്ക്ക് രാഷ്ട്രീയ സംരക്ഷണം നൽകുന്ന പാകിസ്ഥാന്റെ നിലപാടിനെ രാജ്‌നാഥ് സിംഗ് രൂക്ഷമായി വിമർശിച്ചു. ഭീകരത എന്നത് കേവലം ഒരു രാജ്യവിരുദ്ധ പ്രവർത്തിയല്ലെന്നും, അതിന് പ്രവർത്തനപരമായ , പ്രത്യയശാസ്ത്രപരമായ, രാഷ്ട്രീയമായ എന്നിങ്ങനെ മൂന്ന് തലങ്ങളുണ്ടെന്നും അദ്ദേഹം നിരീക്ഷിച്ചു. ഇന്ത്യയും പാകിസ്ഥാനും ഒരേ സമയം സ്വാതന്ത്ര്യം നേടിയ രാജ്യങ്ങളാണെങ്കിലും, ഇന്ന് ഇന്ത്യ ഇൻഫർമേഷൻ ടെക്‌നോളജിയിൽ (IT) ലോകത്തിന് മാതൃകയാകുമ്പോൾ പാകിസ്ഥാൻ അറിയപ്പെടുന്നത് അന്താരാഷ്ട്ര ഭീകരതയുടെ പേിലാണെന്നും അദ്ദേഹം പരിഹസിച്ചു. നമ്മുടെ സൈനിക ശേഷി സമാധാനകാലത്ത് മാത്രമല്ല, യുദ്ധകാലത്തും വേഗത്തിൽ വിപുലീകരിക്കാൻ പ്രാപ്തമാണെന്ന് തെളിയിക്കപ്പെട്ടതായും അദ്ദേഹം ഓർമ്മിപ്പിച്ചു.