ദില്ലി : പപഹല്ഗാമിൽ വിനോദസഞ്ചാരികൾക്കെതിരെ ഉണ്ടായ ഭീകരാക്രമണത്തെ തുടര്ന്ന് ഇന്ത്യ – പാകിസ്ഥാൻ നയതന്ത്ര ബന്ധം കൂടുതൽ മോശമായതിനിടെ യുദ്ധവിമാനങ്ങൾ ഉപയോഗിച്ച് വ്യോമാഭ്യാസം ആരംഭിച്ച് ഇന്ത്യൻ വ്യോമസേന. ഓപ്പറേഷന് ആക്രമണ് എന്ന പേരിട്ടിരിക്കുന്ന വ്യോമാഭ്യാസത്തില് റഫാല് യുദ്ധവിമാനങ്ങളും സുഖോയ്-30 യുദ്ധവിമാനങ്ങളുമാണ് പങ്കെടുക്കുന്നത്. അംബാല, ഹഷിമാര എയര് ബേസുകളില് നിന്നാണ് റഫാല് യുദ്ധവിമാനങ്ങളെത്തിയത്.
പര്വ്വത പ്രദേശങ്ങളിലും സമതലപ്രദേശങ്ങളിലും നടത്തുന്ന കരയാക്രമണങ്ങളുടെ വിവിധ രീതികള് സേന പ്രദര്ശിപ്പിച്ചു. പരിചയസമ്പന്നരായ വ്യോമസേന പരിശീലകരുടെ നേതൃത്വത്തിലാണ് വ്യോമാഭ്യാസം നടത്തുന്നത്. മെറ്റിയോര്, റാംപേജ് ആന്ഡ് റോക്സ് മിസൈലുകള് ഉപയോഗിച്ചുള്ള ആക്രമണങ്ങളും വ്യോമാഭ്യാസത്തിലുള്പ്പെട്ടിട്ടുണ്ട്.
2019-ല് പുല്വാമയില് ഭീകരാക്രമണമുണ്ടായപ്പോള് പാക് അതിര്ത്തി കടന്നുചെന്ന് ഭീകരകേന്ദ്രങ്ങള് ഇന്ത്യ ബോംബിട്ട് തകര്ത്തിരുന്നു. മിറാഷ്-2000 യുദ്ധവിമാനങ്ങള് ഉപയോഗിച്ചാണ് അന്ന് വ്യോമസേന ആക്രമണം നടത്തിയത്.
