പാകിസ്ഥാൻ മധ്യസ്ഥത വഹിച്ച ഇറാൻ – അമേരിക്ക ചർച്ച വമ്പൻ പരാജയം ! ഉടമ്പടിയില്ലാതെ മടങ്ങുന്നുവെന്ന് അമേരിക്കൻ വൈസ് പ്രസിഡന്റ് ജെ ഡി വാൻസ്

ഇസ്‌ലാമാബാദ്: പശ്ചിമേഷ്യയിലെ സംഘർഷങ്ങൾക്ക് അറുതി വരുത്താനായി പാകിസ്ഥാന്റെ മധ്യസ്ഥതയിൽ ഇസ്‌ലാമാബാദിൽ നടന്ന നിർണ്ണായകമായ ഇറാൻ – അമേരിക്ക ചർച്ചകൾ വമ്പൻ പരാജയം. ദീർഘനേരം നീണ്ടുനിന്ന ചർച്ചകൾക്കൊടുവിൽ യാതൊരുവിധ ഉടമ്പടികളും ഇല്ലാതെയാണ് അമേരിക്കൻ പ്രതിനിധി സംഘം മടങ്ങുന്നത്. ചർച്ചകളിൽ പുരോഗതിയുണ്ടായില്ലെന്ന് അമേരിക്കൻ വൈസ് പ്രസിഡന്റ് ജെ.ഡി. വാൻസ് ഔദ്യോഗികമായി സ്ഥിരീകരിച്ചു. ഇറാനുമായുള്ള 21 മണിക്കൂർ നീണ്ട ചർച്ചകളിൽ കാര്യമായ മാറ്റങ്ങളൊന്നും സംഭവിച്ചില്ലെന്നും സമാധാന ശ്രമങ്ങൾ ഇപ്പോഴും അനിശ്ചിതത്വത്തിലാണെന്നും അദ്ദേഹം വ്യക്തമാക്കി.

അമേരിക്ക മുന്നോട്ടുവെച്ച നിബന്ധനകൾ അംഗീകരിക്കാൻ ഇറാൻ തയ്യാറാകാത്തതാണ് ചർച്ചകൾ വഴിമുട്ടാൻ കാരണമായത്. വരും വർഷങ്ങളിൽ ആണവായുധങ്ങൾ നിർമ്മിക്കില്ലെന്ന കൃത്യമായ ഉറപ്പ് ഇറാനിൽ നിന്ന് അമേരിക്ക ആവശ്യപ്പെട്ടിരുന്നു. ഇറാന്റെ മുൻപത്തെ ആണവ നിലയങ്ങളും യുറേനിയം സമ്പുഷ്ടീകരണ സംവിധാനങ്ങളും തകർക്കപ്പെട്ടെങ്കിലും, ഭാവിയിൽ ഇത്തരം പ്രവർത്തനങ്ങളിലേക്ക് കടക്കില്ലെന്ന ഉറപ്പ് നൽകാൻ അവർ വിസമ്മതിക്കുകയായിരുന്നുവെന്ന് വാൻസ് പറഞ്ഞു. ഈ പരാജയം അമേരിക്കയെക്കാൾ കൂടുതൽ ബാധിക്കുക ഇറാനെയായിരിക്കുമെന്നും വൈസ് പ്രസിഡന്റ് കൂട്ടിച്ചേർത്തു.

അതേസമയം, ചർച്ചയുടെ ഫലം എന്തുതന്നെയായാലും തങ്ങൾ ഇറാനെ സൈനികമായി പരാജയപ്പെടുത്തിക്കഴിഞ്ഞു എന്നായിരുന്നു പ്രസിഡന്റ് ഡൊണാൾഡ് ട്രമ്പിന്റെ പ്രതികരണം. ഇറാന്റെ നാവിക, വ്യോമ സേനകളെയും റഡാർ സംവിധാനങ്ങളെയും അമേരിക്കൻ സൈന്യം നിഷ്ക്രിയമാക്കിയതായി ട്രംപ് അവകാശപ്പെട്ടു. ഇതിനുപുറമെ, ഹോർമുസ് കടലിടുക്കിലെ കപ്പൽ ഗതാഗതം പുനഃസ്ഥാപിക്കുന്നതുമായി ബന്ധപ്പെട്ട തർക്കങ്ങളും നിലനിൽക്കുകയാണ്. ഇറാനിലെ നിലവിലെ ഭരണനേതൃത്വം ദുർബലമായെന്നും അമേരിക്കൻ താൽപ്പര്യങ്ങൾ സംരക്ഷിക്കപ്പെട്ടു കഴിഞ്ഞുവെന്നും ട്രമ്പ് മാധ്യമങ്ങളോട് പറഞ്ഞു. ഇതിനിടെ ചൈന ഇറാനെ സഹായിക്കാൻ ശ്രമിച്ചാൽ വലിയ പ്രത്യാഘാതങ്ങൾ നേരിടേണ്ടി വരുമെന്ന മുന്നറിയിപ്പും ട്രമ്പ് നൽകിയിട്ടുണ്ട്.