തിരഞ്ഞെടുപ്പിൽ ഭാര്യ പരാജയപ്പെട്ടു: യുവാവ് ജീവനൊടുക്കി; മരണവാര്‍ത്ത കേട്ട് വിഷം കഴിച്ച ഭാര്യ ഗുരുതരാവസ്ഥയില്‍

ഭുവനേശ്വര്‍: തെരെഞ്ഞെടുപ്പിൽ മത്സരിച്ച ഭാര്യ പരാജയപ്പെട്ടതിനെ തുടര്‍ന്ന് യുവാവ് ജീവനൊടുക്കി. ഒഡീഷയിലെ ഭദ്രക് ജില്ലയിലാണ് സംഭവം. പഞ്ചായത്ത് തിരഞ്ഞെടുപ്പിൽ സ്ഥാനാർത്ഥിയായി മത്സരിച്ച ഭാര്യ പരാജയപ്പെട്ടതിനെ തുടർന്നാണ് ആത്മഹത്യ.

അതേസമയം ഭര്‍ത്താവിന്റെ മരണവാര്‍ത്ത കേട്ട് വിഷം കഴിച്ച് ആത്മഹത്യക്ക് ശ്രമിച്ച ഭാര്യ ഗുരുതരാവസ്ഥയില്‍ ആശുപത്രിയില്‍ ചികിത്സയിലാണ്.

ഈയിടെ നടന്ന ത്രിതല പഞ്ചായത്ത് തെരഞ്ഞെടുപ്പിലാണ് സുമതി പരീദ എന്ന യുവതി സ്വതന്ത്ര സ്ഥാനാർത്ഥിയായി മത്സരിച്ചത്. എന്നാൽ ഇവിടെ പരാജയപ്പെട്ട സുമതിയെയും കുടുംബത്തെയും വിജയിച്ച സ്ഥാനാർത്ഥികളുടെ അനുയായികള്‍ ആഘോഷത്തിനിടെ പരിഹസിക്കുകയും ശല്യപ്പെടുത്തുകയും ചെയ്തിരുന്നു.

ഇതിനു പിന്നാലെ തെരഞ്ഞെടുപ്പിന് പണം ചെലവഴിച്ചതിനെ ചൊല്ലി ഞായാറാഴ്ച ഭര്‍ത്താവ് രമാകാന്തും സുമതിയും തമ്മില്‍ വഴക്കിട്ടിരുന്നു. ശേഷം രമാകാന്ത് വീട്ടിനുള്ളില്‍ തൂങ്ങി മരിക്കുകയായിരുന്നു. തുടർന്ന് ഭര്‍ത്താവിന്റെ മരണത്തില്‍ മനംനൊന്ത് സുമതി വിഷം കഴിച്ച് ആത്മഹത്യക്ക് ശ്രമിക്കുകയായിരുന്നു. ഉടന്‍ തന്നെ സമീപവാസികള്‍ ആശുപത്രിയില്‍ എത്തിച്ചു. എന്നാൽ നില ഗുരുതരമായതിനാല്‍ കട്ടക്കിലെ സ്വകാര്യ ആശുപത്രിയിലേക്ക് മാറ്റുകയായിരുന്നു.