വിമാനത്തിന്റെ എമർജൻസി വാതിൽ തുറക്കാൻ ശ്രമം; പ്രേതം കൂടിയെന്ന് യാത്രക്കാരൻ; ഇൻഡിഗോ വിമാനത്തിൽ പരിഭ്രാന്തി

വാരണാസി : ബെംഗളൂരുവിൽ നിന്നും വാരണാസിയിലേക്ക് പുറപ്പെട്ട ഇൻഡിഗോ വിമാനത്തിൽ എമർജൻസി വാതിൽ തുറക്കാൻ യാത്രക്കാരന്റെ ശ്രമം. ലാൻഡിംഗിന് തൊട്ടുമുൻപ് വാതിൽ തുറക്കാൻ ശ്രമിച്ച ഉത്തർപ്രദേശ് മൗ സ്വദേശി മുഹമ്മദ് അദ്നാനാണ് പിടിയിലായത്. പിടിക്കപ്പെട്ടപ്പോൾ താൻ ‘പ്രേതബാധിതൻ’ ആണെന്നും അതുകൊണ്ടാണ് ഇങ്ങനെ ചെയ്തതെന്നുമായിരുന്നു ഇയാളുടെ വിചിത്രമായ അവകാശവാദം.

ശനിയാഴ്ച രാത്രി എട്ടരയോടെ ബെംഗളൂരുവിൽ നിന്ന് പുറപ്പെട്ട 6E-185 വിമാനത്തിലാണ് സംഭവം. യാത്ര തുടങ്ങി 15 മിനിറ്റിനുള്ളിൽ തന്നെ അദ്നാൻ എമർജൻസി വാതിലിൽ സ്പർശിക്കാൻ ശ്രമിച്ചിരുന്നു. അന്ന് ജീവനക്കാർ മുന്നറിയിപ്പ് നൽകി ഇയാളെ പിന്തിരിപ്പിച്ചു. എന്നാൽ രാത്രി 10:20-ഓടെ വാരണാസി വിമാനത്താവളത്തിൽ ലാൻഡിംഗിന് വെറും 500 അടി മാത്രം ഉയരത്തിൽ നിൽക്കെ ഇയാൾ വീണ്ടും വാതിൽ തുറക്കാൻ ആഞ്ഞുപിടിച്ചു. പന്തികേട് മണത്ത പൈലറ്റ് ഉടൻ തന്നെ ലാൻഡിംഗ് ഒഴിവാക്കി വിമാനം ഉയർത്തുകയും പിന്നീട് 10:35-ഓടെ സുരക്ഷിതമായി ലാൻഡ് ചെയ്യുകയുമായിരുന്നു.

ലാൻഡിംഗിന് പിന്നാലെ സി.ഐ.എസ്.എഫ് ഉദ്യോഗസ്ഥർ ഇയാളെ കസ്റ്റഡിയിലെടുത്തു. ചോദ്യം ചെയ്യലിലാണ് താൻ എന്താണ് ചെയ്തതെന്ന് അറിയില്ലെന്നും തന്നിൽ പ്രേതം കയറിയതാണെന്നും ഇയാൾ മൊഴി നൽകിയത്. എന്നാൽ പിന്നീട് താൻ ഗോവയിൽ വിനോദയാത്ര കഴിഞ്ഞ് മടങ്ങുകയായിരുന്നുവെന്നും കൈപിടി തിരിക്കുമ്പോൾ അത് എമർജൻസി വാതിലാണെന്ന് അറിഞ്ഞില്ലെന്നും ഇയാൾ തിരുത്തി പറഞ്ഞു. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.