കാബൂൾ: താലിബാൻ ഭരണത്തിൽ നട്ടംതിരിഞ്ഞ് അഫ്ഗാൻ (Afghan People) ജനത. താലിബാൻ ഭീകരർ രാജ്യം കീഴടക്കിയത് മുതൽ ഞെട്ടിപ്പിക്കുന്ന സംഭവങ്ങളാണ് രാജ്യത്ത് നിന്ന് റിപ്പോർട്ട് ചെയ്തുകൊണ്ടിരിക്കുന്നത്. ഇപ്പോഴിതാ താലിബാൻ അധികാരത്തിലേറിയതിന് പിന്നാലെ ജനങ്ങൾ അനുഭവിക്കുന്ന ദുരിതങ്ങൾ വ്യക്തമാക്കിക്കൊണ്ടുള്ള കൂടുതൽ വീഡിയോകൾ പുറത്തുവന്നിരിക്കുകയാണ്.
ഒരു നേരത്തെ ഭക്ഷണത്തിന് പോലും ഗതിയില്ലാതെയാണ് രാജ്യത്തെ ഭൂരിഭാഗം ജനങ്ങളും ജീവിക്കുന്നത് എന്ന് ചൂണ്ടിക്കാട്ടി നിരവധി റിപ്പോർട്ടുകൾ പുറത്ത് വന്നിരിക്കുന്നത്. ഇത് പൂർണ്ണമായും ശരിവെക്കുന്ന വീഡിയോകളും സാമൂഹ്യമാധ്യമങ്ങളിൽ പ്രചരിക്കുന്നുണ്ട്. അതേസമയം അഫ്ഗാനിലെ നാല് കോടിയോളം ജനങ്ങളിൽ രണ്ടരക്കോടിയോളം പേർ ഭക്ഷണത്തിന് കടുത്ത ദാരിദ്ര്യം അനുഭവിക്കുമെന്ന് വേൾഡ് ഫുഡ് പ്രോഗ്രാമും മുന്നറിയിപ്പ് നൽകിയിരുന്നു. താലിബാൻ അധികാരത്തിൽ വന്ന് രണ്ട് മാസത്തിനുള്ളിൽ തന്നെ 15 കോടിയോളം ജനങ്ങൾ ദുരിതത്തിന്റെ തീവ്രത അനുഭവിച്ചുവെന്നാണ് റിപ്പോർട്ട് പറയുന്നത്.
ഇതിനുപുറമെ ഒരു ബേക്കറിക്ക് മുന്നിൽ ഒരു കഷണം ബ്രഡിന് വേണ്ടി തിക്കിതിരക്കി അടികൂടുന്ന പുരുഷന്മാരുടേയും സ്ത്രീകളുടേയും വീഡിയോകളാണ് പുറത്ത് വന്നിരിക്കുന്നത്. കടയ്‌ക്ക് മുന്നിൽ സ്ത്രീകളുടെ വലിയൊരു കൂട്ടം കാണാം. കടയ്‌ക്കുള്ളിൽ നിന്നും ചപ്പാത്തി പോലൊരു വസ്തു ഒരാൾ എടുക്കുന്നുണ്ട്. ഇത് വാങ്ങാനായി സ്ത്രീകളും കുട്ടികളുമെല്ലാം അടിപിടി കൂടുന്ന വീഡിയോയും സാമൂഹ്യമാധ്യമങ്ങളിൽ വ്യാപകമായി പ്രചിക്കുന്നുണ്ട്.
