അജ്മലിനെതിരെ വൻ ജനരോഷം ! ജീപ്പ് വളഞ്ഞ് നാട്ടുകാർ ; മൈനാഗപ്പള്ളി കാർ കയറ്റിക്കൊലയിൽ ഒന്നാം പ്രതിയുമായി അപകടസ്ഥലത്ത് തെളിവെടുപ്പിന് വന്ന പോലീസ് സംഘം തെളിവെടുക്കാനാകാതെ മടങ്ങി

കൊല്ലം : മൈനാഗപ്പള്ളി ആനൂര്‍ക്കാവില്‍ സ്‌കൂട്ടര്‍ യാത്രികയെ ഇടിച്ചിട്ട ശേഷം കാര്‍ കയറ്റിയിറക്കി കൊലപ്പെടുത്തിയ കേസിലെ ഒന്നാം പ്രതി അജ്മലുമായി അപകടസ്ഥലത്ത് തെളിവെടുപ്പിന് വന്ന പോലീസ് സംഘം തെളിവെടുക്കാനാകാതെ മടങ്ങി. അപകടം നടന്ന ആനൂർക്കാവിൽ പ്രതിക്കെതിരെ പ്രതിഷേധമുയർത്തി ജനം പോലീസ് ജീപ്പ് വളഞ്ഞതോടെ ആക്രമണമുണ്ടാകുമെന്ന് ഭയന്ന് പോലീസ് പ്രതിയെ വാഹനത്തിൽ നിന്ന് പുറത്തേക്ക് ഇറക്കിയില്ല.

നേരത്തെ അപകട ശേഷം രക്ഷപ്പെട്ട അജ്മലിനെയും ഡോ. ശ്രീക്കുട്ടിയെയും നാട്ടുകാർ തടഞ്ഞുവച്ച നോർത്ത് മൈനാഗപ്പള്ളിയിലെ ഒഴിഞ്ഞ സ്ഥലത്ത് എത്തിച്ച് തെളിവെടുത്തിരുന്നു.കൂടാതെ പ്രതികൾ താമസിച്ച കരുനാഗപ്പള്ളിയിലെ ഹോട്ടലിലും അജ്മലിന്റെ സുഹൃത്തിന്റെ വീട്ടിലും തെളിവെടുത്തു. ഈ സുഹൃത്തിന്റെ കാറാണ് പ്രതി ഓടിച്ചിരുന്നത്.

ഒന്നാം പ്രതി അജ്മലിനെയും രണ്ടാം പ്രതി ഡോ.ശ്രീക്കുട്ടിയെയും ഞായറാഴ്ച വൈകുന്നേരം 5 മണിവരെയാണ് ശാസ്താംകോട്ട മജിസ്ട്രേറ്റ് കോടതി കസ്റ്റഡിയിൽ നൽകിയിരിക്കുന്നത്. അജ്മലും ഡോ. ശ്രീക്കുട്ടിയും എംഡിഎംഎ ഉപയോ​ഗിച്ചിരുന്നതായി നേരത്തെ പോലീസ് കണ്ടെത്തിയിരുന്നു. കരുനാ​ഗപ്പള്ളിയിലെ ഒരു ഹോട്ടലിൽനിന്ന് ഇതുസംബന്ധിച്ച സുപ്രധാന തെളിവുകൾ അന്വേഷണസംഘത്തിന് ലഭിച്ചു. മൈനാഗപ്പള്ളിയിലെ സംഭവത്തിന്റെ തലേന്ന് 14-ാം തീയതി വൈകുന്നേരം പ്രതികൾ ഹോട്ടലിൽ മുറിയെടുത്തിരുന്നുവെന്നും ഇവിടെവെച്ച് ഇരുവരും ലഹരി ഉപയോ​ഗിച്ചെന്നുമാണ് പോലീസ് കണ്ടെത്തിയത്. മദ്യക്കുപ്പികളും രാസലഹരി ഉപയോ​ഗിക്കാൻ സഹായിക്കുന്ന ഉപകരണങ്ങളും ഹോട്ടൽ മുറിക്കുള്ളിൽനിന്ന് കണ്ടെടുത്തിട്ടുണ്ട്. ഇവ രാസപരിശോധനയക്ക് അയക്കും.

14-ാം തീയതി കൂടാതെ ഈ മാസം ഒന്ന്, ഒൻപത് തീയതികളിലും പ്രതികൾ ഇതേ ഹോട്ടലിൽ മുറിയെടുത്തിരുന്നുവെന്നാണ് അന്വേഷണസംഘം വ്യക്തമാക്കുന്നത്. ഇവിടത്തെ സിസിടിവി ദൃശ്യങ്ങളടക്കം പോലീസ് ശേഖരിച്ചിട്ടുണ്ട്.