ചരിത്രം കുറിച്ച് ബിഹാറിൽ നരേന്ദ്രമോദിയുടെ റോഡ് ഷോ; പിന്നാലെ പാറ്റ്‌ന സാഹിബ് ഗുരുദ്വാര സന്ദർശനം; ഭക്ഷണം പാകം ചെയ്തും വിളമ്പിയും വിശ്വാസികളോടൊപ്പം പ്രധാനമന്ത്രി

പാറ്റ്‌ന: ഞായറാഴ്ച വൈകുന്നേരം നടന്ന ചരിത്രം കുറിച്ച റോഡ് ഷോയ്ക്ക് ശേഷം ഇന്ന് രാവിലെ പാറ്റ്‌ന സാഹിബ് ഗുരുദ്വാര സന്ദർശനം നടത്തി പ്രധാനമന്ത്രി നരേന്ദ്രമോദി. ഗുരുദ്വാരയിൽ പ്രാർത്ഥന നടത്തിയ പ്രധാനമന്ത്രി ഭക്ഷണം പാകം ചെയ്തും വിളമ്പിയും വിശ്വാസികളോടൊപ്പം സമയം ചെലവഴിച്ചു. ഹാജിപ്പൂർ, മുസാഫർപൂർ,സരൺ തുടങ്ങിയ മണ്ഡലങ്ങളിൽ മൂന്ന് റാലികളിൽ ഇന്ന് പ്രധാനമന്ത്രി പങ്കെടുക്കും.

ഇന്നലെ വൈകുന്നേരം 07.20 നാണ് പാറ്റ്നയിലെ ഭട്ടാചാര്യ റോഡിൽ നിന്നാണ് റോഡ് ഷോ ആരംഭിച്ചത്. ഒരു പ്രധാനമന്ത്രി ബിഹാറിൽ നടത്തുന്ന ആദ്യ റോഡ് ഷോയാണ് ബിഹാറിൽ ഇന്നലെ നടന്നത്. രണ്ട് കിലോമീറ്ററിനപ്പുറം ഉദ്യോഗ്ഭവനിലാണ് റോഡ് ഷോ അവസാനിച്ചത്. ബിഹാർ മുഖ്യമന്ത്രി നിതീഷ് കുമാറും, ഉപമുഖ്യമന്ത്രി സാമ്രാട്ട് ചൗധരിയും ചേർന്നാണ് മോദിയെ സ്വാഗതം ചെയ്‌തത്‌. പാറ്റ്‌ന സാഹിബ് സ്ഥാനാർത്ഥി രവിശങ്കർ പ്രസാദും പ്രധാനമന്ത്രിയുടെ തുറന്ന വാഹനത്തിൽ ഉണ്ടായിരുന്നു.

ബിഹാറിൽ പ്രധാനമന്ത്രി നരേന്ദ്രമോദി ഇതിനോടകം 07 റാലികളിൽ പങ്കെടുത്തുകഴിഞ്ഞു. 40 ലോക്‌സഭാ മണ്ഡലങ്ങളാണ് ബിഹാറിലുള്ളത്. 2019 ൽ 39 മണ്ഡലങ്ങളും ബിജെപി പിടിച്ചിരുന്നു. നിതീഷ് കുമാറിന്റെ മടങ്ങി വരവിന് ശേഷം ബിഹാറിൽ ഇത്തവണ വലിയ വെല്ലുവിളികളില്ല. ഇന്ന് വാരാണസിയിലും പ്രധാനമന്ത്രിയുടെ റോഡ് ഷോ ഉണ്ട്. നാളെ അദ്ദേഹം പത്രിക സമർപ്പിക്കും