പിഎസ്‌സി ചോദ്യപ്പേപ്പർ ചോർച്ച; ധാർമിക ഉത്തരവാദിത്വമേറ്റെടുത്ത് മുഖ്യമന്ത്രി വി.ഡി. സതീശൻ രാജിവെക്കണമെന്ന് യുവമോർച്ച

തിരുവനന്തപുരം: കേരളത്തിലെ ഉദ്യോഗാർത്ഥികളുടെ കടക്കൽ കത്തിവെച്ച പി.എസ്‌.സിക്കെതിരെ യുവമോർച്ചയുടെ ജനകീയ പ്രക്ഷോഭം. ആസൂത്രണ ബോർഡിലെ തസ്തികയിലേക്ക് നടന്ന പരീക്ഷയിൽ സിപിഎം അനുഭാവിക്കുവേണ്ടി മൂല്യനിർണയത്തിൽ ഉൾപ്പെടെ ക്രമക്കേട് നടത്തിയ പിഎസ്‌സിയെ ഇനി കേരളത്തിലെ ഉദ്യോഗാർത്ഥികൾക്ക് വിശ്വാസമില്ല എന്ന് യുവമോർച്ച സംസ്ഥാന അധ്യക്ഷൻ വി.മനുപ്രസാദ് പത്രസമ്മേളനത്തിൽ പറഞ്ഞു.

തങ്ങളുടെ ഇഷ്ടക്കാരൻ ഉത്തരമെഴുതാത്ത 10 ചോദ്യങ്ങൾക്ക് മൂല്യനിർണയം നടത്താതെ സാധാരണ ഉദ്യോഗാർത്ഥികളുടെ 54 മാർക്കാണ് പി.എസ്‌.സിയിലെ കള്ളന്മാർ തട്ടിക്കളഞ്ഞത്. ആലപ്പുഴയിൽ നടന്ന പിഎസ്‌സി പ്രിലിമിനറി പരീക്ഷാ പേപ്പർ ചോർന്ന വിഷയം അതീവ ഗൗരവത്തോടെ അന്വേഷിക്കേണ്ടതുണ്ട്. വിഷയത്തിൽ നിഷ്പക്ഷമായ അന്വേഷണം ഉറപ്പാക്കാൻ കേന്ദ്ര അന്വേഷണ ഏജൻസിയെ ചുമതലപ്പെടുത്തണമെന്നതാണ് കേരളത്തിലെ യുവാക്കളുടെ ആവശ്യം. മുൻപ് നാല് ദിവസങ്ങളിലായി നടത്തിയിരുന്ന പരീക്ഷ രണ്ട് ദിവസമായി ചുരുക്കുകയും, രാവിലെയും ഉച്ചയ്ക്കും നടക്കേണ്ട ചോദ്യപേപ്പറുകൾ ഒറ്റയടിക്ക് സെന്ററുകളിൽ എത്തിക്കുകയും ചെയ്തതിൽ ദുരൂഹതയുണ്ട്. വി.ഡി. സതീശന്റെ നേതൃത്വത്തിലുള്ള സർക്കാർ അധികാരമേറ്റ ശേഷം നടന്ന ആദ്യ പ്രധാന പരീക്ഷയിൽ തന്നെ ചോദ്യപേപ്പർ ചോർന്നതിന്റെ ഉത്തരവാദിത്തം ഏറ്റെടുത്ത് ഭരണ നേതൃത്വം ഒഴിയണമെന്ന് യുവമോർച്ച ആവശ്യപ്പെട്ടു. തിരുവനന്തപുരത്ത് വിളിച്ചുചേർത്ത പത്രസമ്മേളനത്തിൽ യുവമോർച്ച സംസ്ഥാന ട്രഷറർ റിഷഭ് മോഹൻ, സംസ്ഥാന മീഡിയ കൺവീനർ എസ്. നന്ദു, സംസ്ഥാന സോഷ്യൽ മീഡിയ കൺവീനർ വിഷ്ണുപ്രകാശ്, സിറ്റി ജില്ലാ ഭാരവാഹി ആകാശ് എന്നിവരും പങ്കെടുത്തു.