പരീക്ഷാ പരിഷ്കരണ ബില്ലിനെ സ്വാഗതം ചെയ്ത് സോനം വാങ്ചുക്; സർക്കാരിന് അഭിനന്ദനം

ദില്ലി : പാർലമെന്റിൽ അവതരിപ്പിച്ച പൊതുപരീക്ഷാ ഭേദഗതി ബില്ലിനെ സ്വാഗതം ചെയ്ത് സോനം വാങ്ചുക്. പരീക്ഷാ രീതികളിൽ കൊണ്ടുവരുന്ന ഈ നിയമനിർമ്മാണം രാജ്യത്തെ മൊത്തം വിദ്യാഭ്യാസ സമ്പ്രദായത്തിലും വലിയ മാറ്റങ്ങൾക്കും ഗുണപരമായ പരിഷ്കാരങ്ങൾക്കും വഴിവെക്കുമെന്നാണ് താൻ പ്രതീക്ഷിക്കുന്നതെന്ന് അദ്ദേഹം വ്യക്തമാക്കി. അതേസമയം, പരീക്ഷാ തിരിമറികൾക്കെതിരെ അടുത്തിടെ നടന്ന രാജ്യവ്യാപക പ്രക്ഷോഭങ്ങളിൽ പങ്കെടുത്ത വിദ്യാർത്ഥികൾക്കെതിരെ യാതൊരു വിധ നിയമനടപടികളും സ്വീകരിക്കില്ലെന്ന് കേന്ദ്ര സർക്കാർ നൽകിയ ഉറപ്പ് പാലിക്കണമെന്നും അദ്ദേഹം ആവശ്യപ്പെട്ടു.

ദില്ലിയിൽ നിന്ന് ശ്രീനഗറിലേക്കുള്ള വന്ദേ ഭാരത് ട്രെയിൻ യാത്രയ്ക്കിടെ ‘എക്സ്’ (X) പ്ലാറ്റ്‌ഫോമിൽ പങ്കുവെച്ച വീഡിയോ സന്ദേശത്തിലാണ് വാങ്ചുക് തൻറെ നിലപാട് വ്യക്തമാക്കിയത്. ചിനാബ് റെയിൽ പാലത്തിലൂടെയുള്ള യാത്ര നൽകിയ മനോഹരമായ അനുഭവത്തെക്കുറിച്ച് പരാമർശിച്ച അദ്ദേഹം, ഇന്ത്യൻ റെയിൽവേയുടെ നേട്ടങ്ങളിൽ താൻ വളരെയധികം അഭിമാനിക്കുന്നുവെന്നും കൂട്ടിച്ചേർത്തു.