ഊട്ടിയിലെ സൈനിക ഹെലികോപ്റ്റർ അപകടം; സംയുക്ത സേനാ മേധാവി ജനറൽ ബിപിൻ റാവത്തിന്റെ അപ്രതീക്ഷിത വിയോഗം നികത്താനാകാത്ത നഷ്ടമെന്ന് പുഷ്‌കർ സിങ് ധാമി; മൂന്ന് ദിവസത്തെ ദു:ഖാചരണം പ്രഖ്യാപിച്ച് ഉത്തരാഖണ്ഡ് സർക്കാർ

ഉത്തരാഖണ്ഡ്: ഭാരതത്തിന്റെ സംയുക്ത സൈനിക മേധാവി ബിപിൻ റാവത്ത്(Bipin Rawat) ഹെലികോപ്റ്റർ അപകടത്തിൽ മരിച്ച സംഭവത്തിൽ മൂന്ന് ദിവസത്തെ ദുഖാചരണം പ്രഖ്യാപിച്ച് ഉത്തരാഖണ്ഡ് സർക്കാർ.

അദ്ദേഹത്തിന്റെ മരണം രാജ്യത്തിന് നികത്താനാകാത്ത നഷ്ടമാണെന്ന് മുഖ്യമന്ത്രി പുഷ്‌കർ സിങ് ധാമി പറഞ്ഞു. ഉത്തരാഖണ്ഡിന്റെ മകനെ ഓർത്ത് തങ്ങൾ എപ്പോഴും അഭിമാനം കൊള്ളുന്നുവെന്നും അദ്ദേഹം പറഞ്ഞു.

കൂടാതെ ദു:ഖാചരണത്തിന്റെ ഭാഗമായി സർക്കാർ സ്ഥാപനങ്ങളിൽ ദേശീയ പതാക താഴ്‌ത്തിക്കെട്ടും.

ഉത്തരാഖണ്ഡിലെ പൗരി ജില്ലയിലെ സൈന ഗ്രാമമാണ് അദ്ദേഹത്തിന്റെ സ്വദേശം. പൗരിയിൽ 1958 മാർച്ച് 16നാണ് അദ്ദേഹത്തിന്റെ ജനനം.

ഇന്ന് മുതൽ 12ാം തിയതി വരെയാണ് രാജ്യത്ത് ദു:ഖാചരണം പ്രഖ്യാപിച്ചിരിക്കുന്നത്. റാവത്തിന്റെ മരണം ഒരിക്കലും നികത്താനാകത്ത നഷ്ടമാണെന്നും, രാജ്യസുരക്ഷയ്‌ക്ക് അദ്ദേഹം വലിയ സംഭാവന നൽകിയിട്ടുണ്ടെന്നും പുഷ്‌കർ സിങ് ധാമി പറഞ്ഞു.

അതേസമയം അതിർത്തി സുരക്ഷയ്‌ക്കായി റാവത്ത് എടുത്ത ധീരമായ തീരുമാനങ്ങളും അദ്ദേഹത്തിന്റെ സംഭാവനകളും രാജ്യം എല്ലാക്കാലത്തും ഓർത്തിരിക്കുമെന്നും ധാമി പറഞ്ഞു. ഉത്തരാഖണ്ഡിൽ നിയമസഭയുടെ ശീതകാലസമ്മേളനവും മാറ്റി വച്ചിട്ടുണ്ട്. ഇന്ന് നിയമസഭാ സമ്മേളനം ചേരാനായിരുന്നു തീരുമാനിച്ചിരുന്നത്.

കഴിഞ്ഞ ദിവസം ഉച്ചയ്ക്ക് 12.20-ഓടെയാണ് സംയുക്ത സേനാ മേധാവി ബിപിന്‍ റാവത്തും സംഘവും സഞ്ചരിച്ച ഹെലികോപ്റ്റര്‍ നീലഗിരി കൂനൂരിനടുത്ത് അപകടത്തില്‍പ്പെട്ടത്.

സൂലൂരില്‍നിന്ന് ഊട്ടി വെല്ലിങ്ടണിലെ സൈനിക ക്യാമ്പിലേക്ക് പുറപ്പെട്ടതായിരുന്നു സംഘം. എന്നാല്‍ കൂനൂരിനടുത്ത കാട്ടേരിയില്‍ ഹെലികോപ്റ്റര്‍ തകര്‍ന്നുവീഴുകയായിരുന്നു.

ബിപിൻ റാവത്തും ഭാര്യയും അടക്കം 13 പേരാണ് ഹെലിക്കോപ്റ്റർ അപകടത്തിൽ മരിച്ചത്. സുലൂരിലെ വ്യോമതാവളത്തിൽ നിന്നും വെല്ലിംഗ്ടണ്ണിലുള്ള ഡിഫൻസ് സർവ്വീസ് കോളേജിലേക്കുള്ള യാത്രക്കിടെയാണ് അപകടം.

നീലഗിരിയിലെ കുനൂർ കട്ടേരിക്ക് സമീപമാണ് അപകടമുണ്ടായത്. വ്യോമസേനയുടെ MI ശ്രേണിയിലുള്ള 17v5 ഹെലികോപ്ടറാണ് അപകടത്തിൽപ്പെട്ടത്.

ഭാര്യ മധുലിക റാവത്ത്, ബ്രിഗേഡിയർ എൽഎസ് ലിഡർ, ലെഫ്. കേണൽ ഹർജീന്ദർ സിംഗ്, നായ്ക് ഗുർസേവക് സിംഗ്, നായ്ക് ജിതേന്ദ്ര കുമാർ, ലാൻഡ്സ് നായ്ക് വിവേക് കുമാർ, ലാൻഡ്സ് നായ്ക് ബി. സായി തേജ, ഹവിൽദാർ സത്പാൽ എന്നിവരാണ് ഹെലികോപ്ടറിലുണ്ടായിരുന്നത്. അപകടത്തിൽപ്പെട്ടവരിൽ ഗ്രൂപ്പ് ക്യാപ്റ്റൻ വരുൺ സിങ് മാത്രമാണ് അപകടത്തിൽ നിന്ന് രക്ഷപെട്ടത്.