മലപ്പുറത്ത് ഇരുപത്തിരണ്ടുകാരിയെ ബലാത്സംഗം ചെയ്യാന്‍ ശ്രമം; ചെറുക്കാൻ ശ്രമിച്ച പെൺകുട്ടിയെ കല്ലുകൊണ്ട് ഇടിച്ച് പരിക്കേൽപ്പിച്ചു

മലപ്പുറം: മലപ്പുറത്ത് 22കാരിയെ ബലാത്സംഗം ചെയ്യാന്‍ ശ്രമം (Attack Against Women). കൊണ്ടോട്ടി കോട്ടുകരയിലാണ് സംഭവം നടന്നത്. എന്നാൽ അതിക്രമം ചെറുത്ത യുവതിയെ കല്ലുകൊണ്ട് ക്രൂരമായി ഇടിച്ച് പരിക്കേൽപ്പിച്ചു. പരിക്കേറ്റ പെണ്‍കുട്ടിയെ മഞ്ചേരി മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.

റോഡിലൂടെ നടന്നു പോകുകയായിരുന്ന പെൺകുട്ടിയെ, ആളൊഴിഞ്ഞ സ്ഥലത്ത് വച്ച് യുവാവ് കടന്നുപിടിക്കുകയായിരുന്നു. എന്നാൽ തൊട്ടടുത്ത വയലിലെ വാഴ തോട്ടത്തിലേക്കു പിടിച്ചു വലിച്ച് കൊണ്ടുപോവുന്നതിടെ പെണ്‍കുട്ടി ചെറുക്കുകയായിരുന്നു. ചെറുക്കാൻ ശ്രമിച്ച പെൺകുട്ടിയെ കല്ലുകൊണ്ട് ഇടിച്ച് പരിക്കേൽപ്പിച്ചു. അവിടെ നിന്നും രക്ഷപ്പെട്ട് ഓടിയ പെൺകുട്ടിയെ സാരമായ പരിക്കുകളോടെ കോഴിക്കോട് മെഡിക്കൽ കോളജ് ആശുപത്രിയിൽ പ്രവേശിപ്പിക്കുകയായിരുന്നു.

സംഭവത്തിൽ കൊണ്ടോട്ടി പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്. അതേസമയം പ്രതിയെന്ന് സംശയിക്കുന്ന ആളുടെ ചെരിപ്പ് സംഭവസ്ഥലത്ത് നിന്ന് ലഭിച്ചിട്ടുണ്ട്. കൊണ്ടോട്ടി ഡിവൈഎസ്പി പികെ അഷറഫിന്റെ നേതൃത്വത്തില്‍ പോലീസ് അന്വേഷണം തുടങ്ങിയിട്ടുണ്ട്. പ്രതിയെ ഉടൻ പിടികൂട്ടുമെന്നാണ് സൂചന.