കേരളത്തിന്‍റെ തീരമേഖലകളില്‍ ഭീകരാക്രമണ സാധ്യത- നേരിടാന്‍ പൂര്‍ണ സജ്ജമെന്ന് രാജ് നാഥ് സിംഗ്

കൊല്ലം – കേരളത്തിന്‍റെ തീരമേഖലകളില്‍ ഉള്‍പ്പെടെ ഭീകരാക്രമണ സാധ്യതയെന്ന് കേന്ദ്ര ഇന്‍റിലിജന്‍സിന്‍റെ മുന്നറിയിപ്പുണ്ടെന്ന് കേന്ദ്ര പ്രതിരോധമന്ത്രി രാജ് നാഥ് സിംഗ്.കേരളവും തമിഴ്നാടും ഉള്‍പ്പെടെയുള്ള ദക്ഷിണേന്ത്യന്‍ തീരങ്ങളാണ് ഭീകരര്‍ ലക്ഷ്യം വെക്കുന്നതെന്നും രാജ് നാഥ് സിംഗ് പറഞ്ഞു. ഇതേ തുടര്‍ന്ന് ദക്ഷിണേന്ത്യന്‍ തീരങ്ങളില്‍ തീരദേശസേനയുടെയും നാവികസേനയുടെയും നിരീക്ഷണം കൂടുതല്‍ ശക്തമാക്കിയിട്ടുണ്ട്. ഭീകരര്‍ക്ക് പാക് ചാരസംഘടന ഐ എസ് ഐ യുടെയും പാക് നാവികസേനയുടെയും പരിശീലനവും സഹായവും ലഭിക്കുന്നതായും രാജ് നാഥ് സിംഗ് പറഞ്ഞു.

പ്രധാനമന്ത്രി നരേന്ദ്ര മോദിയെയും ദേശീയ സുരക്ഷാ ഉപദേഷ്ടാവ് അജിത് ഡോവലിനേയും അപായപ്പെടുത്താൻ പാക്ക് ചാരസംഘടനയായ ഐ എസ് ഐ യും പാക്ക് ഭീകര സംഘടന ജെയ്‌ഷെ മുഹമ്മദും പദ്ധതിയിടുന്നതായി രണ്ട് ദിവസം മുൻപാണ് കേന്ദ്ര രഹസ്യാന്വേഷണ ഏജൻസികൾ കേന്ദ്രത്തിന് വിവരം കൈമാറിയത്.ഇതേ തുടര്‍ന്ന് രാജ്യത്തെമ്പാടും കർശന സുരക്ഷയാണ് ഏർപ്പെടുത്തിയിരിക്കുന്നത്. പാകിസ്താന്‍ ഉയര്‍ത്തുന്ന ഏത് വെല്ലുവിളിയും നേരിടാന്‍ സേനകള്‍ സജ്ജമാണെന്ന് കേന്ദ്രപ്രതിരോധമന്ത്രി രാജ് നാഥ് സിംഗ് കൂട്ടിച്ചേര്‍ത്തു. കൊല്ലത്ത് അമൃതപുരിയിൽ മാതാ അമൃതാനന്ദമയിയുടെ ജന്മദിനാഘോഷചടങ്ങില്‍ പങ്കെടുക്കാനെത്തിയതായിരുന്നു അദ്ദേഹം.