ക്രിക്കറ്റിൽ പാകിസ്ഥാൻ ഇന്ത്യയെയും കോഹ്ലിയെയും കണ്ടുപഠിക്കണമെന്ന് റമീസ് രാജ

ഇസ്‍ലാമാബാദ്: ഇന്ത്യൻ ക്രിക്കറ്റ് കൺട്രോൾ ബോർഡിനെയും കളിക്കാരെയും പുകഴ്ത്തി മുൻ പാക് ക്രിക്കറ്ററും കമന്‍റേറ്ററുമായ റമീസ് രാജ. ക്രിക്കറ്റ് ഭരണത്തിലും കളിയിലും ഇന്ത്യയെ കണ്ട് പഠിക്കാനാണ് പാക്കിസ്ഥാൻ ക്രിക്കറ്റ് ബോർഡിനോടുള്ള റമീസ് രാജയുടെ ഉപദേശം. രാജ്യവ്യാപകമായി വേരുകളുള്ള ക്രിക്കറ്റിനെ എങ്ങനെയാണ് മുന്നോട്ടു കൊണ്ടുപോകേണ്ടതെന്ന് ഇന്ത്യൻ ക്രിക്കറ്റ് കണ്‍ട്രോൾ ബോർഡിനെ നോക്കി പഠിക്കണം. കളിയോടുള്ള സമീപനത്തിൽ വിരാട് കോഹ്ലിയെയും സംഘത്തെയും മാതൃകയാക്കാമെന്നും റമീസ് രാജ അഭിപ്രായപ്പെട്ടു.

‘കളിയെ സമീപിക്കുന്ന രീതിയിൽത്തന്നെ ഇന്ന് വ്യാപകമായി മാറ്റം വന്നിട്ടുണ്ട്. ടീമുകൾ നേർക്കുനേർ പോരടിക്കുന്നതാണ് ഇപ്പോഴത്തെ പ്രത്യേകത. വിരാട് കോഹ്ലിയേയും സംഘത്തെയും നോക്കൂ, ആക്രമണോത്സുകത കൊണ്ടും നിർഭയമായ സമീപനം കൊണ്ടും അവർ ഇന്ത്യയുടെ കളിയെ തന്നെ മാറ്റിമറിച്ചു’– തന്‍റെ യൂട്യൂബ് ചാനലിൽ റമീസ് രാജ പറഞ്ഞു.