നവീൻ ബാബുവിനെതിരെ പി പി ദിവ്യ നടത്തിയത് പ്രാദേശിക കേബിൾ ചാനലിനെ കൂട്ടുപിടിച്ചുള്ള ഗൂഡാലോചന; ലാൻഡ് റവന്യു ജോയിന്റ് കമ്മീഷന്‌റെ റിപ്പോർട്ട് സമർപ്പിച്ചു; മുൻ‌കൂർ ജാമ്യാപേക്ഷ കോടതി ഇന്ന് പരിഗണിക്കും

തിരുവനന്തപുരം: കണ്ണൂർ എ ഡി എമ്മായിരുന്ന നവീൻ ബാബുവിന്റെ ആത്മഹത്യയുമായി ബന്ധപ്പെട്ട് അന്വേഷണം നടത്തിയ ലാൻഡ് റവന്യു ജോയിന്റ് കമ്മീഷണർ കെ ഗീത ഐ എ എസ് റിപ്പോർട്ട് സമർപ്പിച്ചു. മുൻ ജില്ലാ പഞ്ചായത്ത് പ്രസിഡന്റ് പി പി ദിവ്യയ്‌ക്കെതിരായ പരാമർശങ്ങൾ റിപ്പോർട്ടിലുണ്ടെന്നാണ് സൂചന. പ്രാദേശിക കേബിൾ ചാനലിനെ കൂട്ടുപിടിച്ചാണ് നവീൻ ബാബുവിനെ അപമാനിക്കാൻ ദിവ്യ നീക്കം നടത്തിയത്. ആരോപണം ഉന്നയിക്കുന്നത് ചിത്രീകരിക്കുകയും മാധ്യമങ്ങൾക്ക് എത്തിച്ചു നൽകുകയും ചെയ്തത് ദിവ്യയാണെന്നാണ് കണ്ടെത്തൽ. എ ഡി എമ്മിന്റെ ആത്മഹത്യയുമായി ബന്ധപ്പെട്ട ആറ് കാര്യങ്ങളാണ് കെ ഗീത അന്വേഷിച്ചത്. കളക്ടർ അരുൺ വിജയനടക്കമുള്ള ജീവനക്കാരിൽ നിന്ന് മൊഴിയെടുത്തിരുന്നു. എന്നാൽ പി പി ദിവ്യ മൊഴി നൽകിയില്ല. കൂടുതൽ സമയം വേണമെന്ന് പറഞ്ഞ് അന്വേഷണത്തിൽ നിന്ന് ഒഴിഞ്ഞു മാറുകയായിരുന്നു.

അതേസമയം ദിവ്യയുടെ മുൻ‌കൂർ ജാമ്യാപേക്ഷ കോടതി ഇന്ന് പരിഗണിക്കും. തലശ്ശേരി പ്രിൻസിപ്പൽ സെഷൻസ് കോടതി യാണ് ജാമ്യഹർജി പരിഗണിക്കുക. പി പി ദിവ്യയ്‌ക്കെതിരെ പോലീസ് കോടതിയിൽ റിപോർട്ട് നൽകിയിട്ടുണ്ട്. ജാമ്യം നൽകരുതെന്നാണ് പോലീസിന്റെ ആവശ്യം. നവീൻ ബാബുവിന്റെ ബന്ധുക്കൾ കേസിൽ കക്ഷി ചേരുമോ എന്ന കാര്യത്തിൽ വ്യക്തതയില്ല. കേസെടുത്ത് ഒരാഴ്ച പിന്നിട്ടിട്ടും ദിവ്യയെ അറസ്റ്റ് ചെയ്യാത്തതിൽ പ്രതിഷേധം ശക്തമായിട്ടുണ്ട്.