ഉത്തരകാശിയിൽ ടണൽ തകർന്ന് കുടുങ്ങിയവരെ രക്ഷിക്കാനുള്ള ശ്രമം മൂന്നാം ദിനവും തുടരുന്നു; അപകടത്തിൽ അന്വേഷണം പ്രഖ്യാപിച്ച് ഉത്തരാഖണ്ഡ് സർക്കാർ

ഉത്തരകാശി: ഉത്തരാഖണ്ഡിലെ ഉത്തരകാശിയില്‍ നിര്‍മാണത്തിലിരുന്ന ടണല്‍ തകര്‍ന്ന് കുടുങ്ങിക്കിടക്കുന്ന 40 തൊഴിലാളികളെ രക്ഷപ്പെടുത്താനുള്ള ശ്രമങ്ങൾ മൂന്നാം ദിവസവും പുരോഗമിക്കുന്നു. ടണലിനുള്ളില്‍ തകര്‍ന്ന അവശിഷ്ടങ്ങള്‍ക്കിടയിലൂടെ ഡ്രില്‍ ഉപയോഗിച്ച് ദ്വാരം ഉണ്ടാക്കി സ്റ്റീല്‍ പൈപ്പ് കടത്തിവിടാനും ഇതുവഴി കുടുങ്ങിക്കിടക്കുന്ന 40 തൊഴിലാളികളെ രക്ഷപ്പെടുത്താനുമാണ് ഇപ്പോൾ ശ്രമിക്കുന്നത്. ഇതിനായി ഹരിദ്വാറില്‍ നിന്നും മൂന്ന് അടി വ്യാസമുള്ള എട്ടു പൈപ്പുകള്‍ കൊണ്ടുവന്നിട്ടുണ്ട്. അതേസമയം മണ്ണിടിച്ചിൽ തുടരുന്നതിനാൽ അവശിഷ്ടങ്ങൾ നീക്കം ചെയ്യുന്നത് നിർത്തി വച്ചിരിക്കുകയാണ്. വശങ്ങളിൽ സിമെന്റ് മിശ്രിതം കൊണ്ട് ഉറപ്പ് കൂട്ടുവാനും ശ്രമങ്ങൾ നടക്കുന്നുണ്ട്.

അതിനിടെ അപകടത്തില്‍ സംസ്ഥാന സര്‍ക്കാര്‍ അന്വേഷണവും പ്രഖ്യാപിച്ചു. അപകടത്തിന്റെ കാരണമുള്‍പ്പെടെ അന്വേഷിക്കാനായി വിദഗ്ധരടങ്ങുന്ന ആറംഗ സംഘത്തെയാണ് സര്‍ക്കാര്‍ നിയോഗിച്ചിട്ടുള്ളത്‌. കുടുങ്ങിക്കിടക്കുന്ന തൊഴിലാളികൾക്ക് ഭക്ഷണവും വെള്ളവും നൽകുന്നുണ്ടെന്നും ഇവരുടെ കുടുംബങ്ങളുമായി സംസാരിച്ചുവെന്നും സർക്കാർ വൃത്തങ്ങൾ അറിയിച്ചു.

ബചാര്‍ ധാം റോഡ് പ്രോജക്ടിന്റെ ഭാഗമായി സിക്യാരയേയും ദംദാല്‍ഗാവിനേയും തമ്മില്‍ ബന്ധിപ്പിക്കുന്ന ടണലാണ് ഞായറാഴ്ച പുലർച്ചെയോടെ തകര്‍ന്നത്. പ്രവേശന കവാടത്തില്‍നിന്ന് 200 മീറ്റര്‍ ഉള്ളിലായിരുന്നു അപകടം. 60 മീറ്ററോളമുളള അവശിഷ്ടങ്ങള്‍ നീക്കം ചെയ്ത് തൊഴിലാളികളെ രക്ഷിക്കാനായിരുന്നു ആദ്യശ്രമം. ദുരന്ത നിവാരണ സേനയുടേയും പോലീസിന്റേയും ടണലിന്റെ നിർമ്മാണത്തിന് മേൽനോട്ടം വഹിക്കുന്ന നാഷണൽ ഹൈവേ ആൻഡ് ഇൻഫ്രാസ്ട്രക്ചർ ഡെവലപ്‌മെന്റ് കോർപ്പറേഷൻ ലിമിറ്റഡിലെ (എൻഎച്ച്ഐഡിസിഎൽ) ഉദ്യോഗസ്ഥരുടെയും നേതൃത്വത്തിലാണ് രക്ഷാപ്രവര്‍ത്തനം പുരോഗമിക്കുന്നത്.