അഭിപ്രായ സർവ്വേയിലും വൻ പിന്തുണ! ബ്രിട്ടീഷ് പ്രധാനമന്ത്രി തെരഞ്ഞെടുപ്പിൽ മൂന്നാം റൗണ്ടിലും ഋഷി സുനക് മുന്നിൽ

ബ്രിട്ടീഷ് പ്രധാനമന്ത്രി തെരഞ്ഞെടുപ്പിൽ വീണ്ടും പ്രതീക്ഷ നിലനിർത്തി ഋഷി സുനക്. തിങ്കളാഴ്ച നടന്ന മൂന്നാം ഘട്ട വോട്ടെടുപ്പിലും ഋഷി സുനക് മുന്നിലെത്തിയിരുന്നു. 115 വോട്ടുകളാണ് മൂന്നാം റൗണ്ടിൽ ഋഷി സുനക് നേടിയത്. ഇനി ബാക്കിയുള്ളത് രണ്ട് റൗണ്ടുകളാണ്. മുൻ പ്രതിരോധ മന്ത്രി പെന്നി മൊർഡോണ്ട് 82 വോട്ടുകളും വിദേശകാര്യ സെക്രട്ടറി ലിസ് ട്രസ് 71 വോട്ടുകളും നേടിയിരുന്നു. കെമി ബഡെനോക്ക് 58 വോട്ടുകൾ നേടി നാലാം സ്ഥാനത്തെത്തി.

കഴിഞ്ഞ ദിവസം നടന്ന അഭിപ്രായ സർവ്വേയിലും ഋഷി സുനകിന് വലിയ പിന്തുണയായിരുന്നു ലഭിച്ചത്. 48 ശതമാനം പേരാണ് ഋഷി സുനകിനെ പിന്തുണച്ചത്. ലിസ് ട്രസ് രണ്ടാം സ്ഥാനത്തും, പെന്നി മോർഡോണ്ട് മൂന്നാം സ്ഥാനത്തും എത്തി. 39 ശതമാനം പേർ ലിസ് ട്രസിനേയും 33 ശതമാനം പേർ പെന്നി മോർഡോണ്ടിനേയും പിന്തുണച്ചു.