ജെന്‍സിയുമായി സംവാദത്തിന് മോഹൻ ഭാഗവത്; രാജ്യത്തിന്റെ വിവിധ ഭാഗങ്ങളിൽ നിന്നുള്ള 2,000 വിദ്യാർഥികൾ മുംബൈയിൽ

മുംബൈ: രാജ്യത്തിന്റെ വിവിധ ഭാഗങ്ങളിൽ നിന്നുള്ള യുവതലമുറയുമായി സംവദിക്കാൻ ആർഎസ്എസ് സർസംഘചാലക് മോഹൻ ഭാഗവത്. ഓഗസ്റ്റ് 6-ന് മുംബൈയിൽ നടക്കുന്ന പ്രത്യേക പരിപാടിയിൽ നൂറിലധികം നഗരങ്ങളിൽ നിന്ന് തെരഞ്ഞെടുത്ത രണ്ടായിരത്തോളം വിദ്യാർഥികളുമായാണ് അദ്ദേഹം ആശയവിനിമയം നടത്തുക.

പരിപാടിയിൽ പങ്കെടുക്കുന്നവരിൽ ഭൂരിഭാഗവും 18 മുതൽ 19 വയസ് വരെയുള്ളവരായിരിക്കുമെന്നാണ് വിവരം. യുവജനങ്ങളുടെ ആശയങ്ങളും കാഴ്ചപ്പാടുകളും നേരിട്ട് കേൾക്കുകയും, പുതിയ തലമുറയുമായി സംവാദം ശക്തിപ്പെടുത്തുകയുമാണ് പരിപാടിയുടെ ലക്ഷ്യമെന്ന് ഇന്റർനാഷണൽ മൂവ്‌മെന്റ് യൂണൈറ്റഡ് നേഷൻസ് (IMUN) സ്ഥാപകൻ ഋഷഭ് ഷാ വ്യക്തമാക്കി.

ഐഎംയുഎൻ സംഘടിപ്പിക്കുന്ന 16-ാം വാർഷികാഘോഷങ്ങളുടെ ഭാഗമായാണ് ഈ സംവാദം നടക്കുന്നത്. രാജ്യത്തിന്റെ വിവിധ മേഖലകളിൽ നിന്നുള്ള വിദ്യാർഥികൾക്ക് ദേശീയ വിഷയങ്ങൾ, നേതൃത്വപാടവം, യുവജനങ്ങളുടെ പങ്ക് തുടങ്ങിയ വിഷയങ്ങളിൽ ആർഎസ്എസ് മേധാവിയുമായി നേരിട്ട് ആശയവിനിമയം നടത്താൻ അവസരം ലഭിക്കുമെന്ന് സംഘാടകർ അറിയിച്ചു.

2011-ൽ ആരംഭിച്ച ഐഎംയുഎൻ സംഘടനയുടെ പ്രവർത്തനങ്ങൾക്ക് നേതൃത്വം നൽകുന്നത് പ്രധാനമായും 18 മുതൽ 24 വയസ് വരെയുള്ള യുവാക്കളാണ്. സംഘടനയുടെ മുൻ ഭാരവാഹികളിൽ പലരും പിന്നീട് ജനപ്രതിനിധികൾ, ഉന്നത ഉദ്യോഗസ്ഥർ, അഭിഭാഷകർ, അഭിനേതാക്കൾ, സംരംഭകർ തുടങ്ങി വിവിധ മേഖലകളിൽ ശ്രദ്ധേയരായിട്ടുണ്ട്.

കോൺഗ്രസ് എംപി ശശി തരൂർ, മുൻ സുപ്രീം കോടതി ചീഫ് ജസ്റ്റിസ്, ചലച്ചിത്ര സംവിധായകൻ കരൺ ജോഹർ, ഇതിഹാസ കായികതാരം പി.ടി. ഉഷ എന്നിവരുൾപ്പെടെ വിവിധ മേഖലകളിലെ പ്രമുഖർ സംഘടനയുടെ ഉപദേശക സമിതി അംഗങ്ങളായി പ്രവർത്തിക്കുന്നുണ്ടെന്നും സംഘാടകർ അറിയിച്ചു.