നേരിട്ടത് സങ്കീര്‍ണ്ണമായ വെല്ലുവിളി; യുക്രൈനില്‍ നിന്ന് 22,500 ഇന്ത്യക്കാരെ തിരികെയെത്തിച്ചുവെന്ന് എസ് ജയശങ്കര്‍; കേന്ദ്രത്തെ പ്രശംസിച്ച് കോൺഗ്രസ്

ദില്ലി: യുക്രെയ്നിൽ നിന്ന് 22,500 ഇന്ത്യക്കാരെ തിരിച്ചെത്തിച്ചെന്ന് വിദേശകാര്യമന്ത്രി എസ് ജയശങ്കര്‍ രാജ്യസഭയില്‍ അറിയിച്ചു. സങ്കീര്‍ണ്ണമായ വെല്ലുവിളികളാണ് ഓപ്പറേഷന്‍ ഗംഗ നേരിട്ടത്. സുമിയിലും കാര്‍കീവിലും കനത്ത വെല്ലുവിളികള്‍ നേരിട്ടതായും അദ്ദേഹം പറഞ്ഞു.

പ്രധാനമന്ത്രിയുടെ നേതൃത്വത്തിൽ നടന്നത് വലിയ ഏകോപനമാണ്. എംബസി ജീവനക്കാർ നടത്തിയത് വലിയ സേവനം. നയതന്ത്രത്തലത്തിൽ റഷ്യയുമായും ഇടപെടൽ നടത്തിയെന്നും വിദേശകാര്യമന്ത്രി പറഞ്ഞു. വിദ്യാർത്ഥികളുടെ ഭാവി സംബന്ധിച്ച കാര്യത്തിൽ ഉചിതമായ തീരുമാനമെടുക്കുമെന്നും എസ് ജയശങ്കർ അറിയിച്ചു.

അതേസമയം യുക്രെയ്‌നിലെ യുദ്ധഭൂമിയില്‍നിന്ന്‌ ഇന്ത്യക്കാരെ ഒഴിപ്പിക്കുന്നതിനായുള്ള കേന്ദ്രസർക്കാരിന്റെ രക്ഷാദൗത്യത്തെ പ്രശംസിച്ച് കോൺഗ്രസ്. സർക്കാരിന്റെ ഭാഗത്തുനിന്ന് സത്വര നടപടികളുണ്ടായെന്ന് കോൺഗ്രസ് എംപി ആനന്ദ് ശർമ പറഞ്ഞു.