”മണിമണ്ഡപവും തങ്കധ്വജവും” പുസ്തക പ്രകാശനം നവംബർ 20ന്

“മണിമണ്ഡപവും തങ്കധ്വജവും” പുസ്തക പ്രകാശനം നവംബർ 20ന് നടക്കും. മാളികപ്പുറത്തമ്മയുടെ യാഥാർത്ഥ്യം, ബ്രഹ്മചര്യം, ശബരിമലയിലെ (Sabarimala) മകരവിളക്കു മഹോത്സവം, ആചാരാനുഷ്ഠാനങ്ങൾ തുടങ്ങി ശബരിമലയിൽ പുതുതായി സ്ഥാപിതമായ തങ്കധ്വജത്തിന്റെ ആലോചന മുതൽ പൂർത്തീകരണം വരെയുള്ള എല്ലാ വിവരങ്ങളും വളരെ കൃത്യതയോടെ പറഞ്ഞിരിക്കുന്ന ഒരു പുസ്തകമാണ് ഇത്. ശബരിമലയടക്കം നിരവധി ക്ഷേത്രങ്ങളും ക്ഷേത്രകൊടിമരങ്ങളും സ്വർണ്ണ കൊടിമരങ്ങളും നിർമ്മിക്കാൻ ഭാഗ്യം സിദ്ധിച്ച ശ്രീ. അനന്തൻ ആചാരിയുടെ മകനും ശബരിമല കൊടിമര നിർമ്മാണത്തിൽ പ്രധാന പങ്കും വഹിച്ച അനു അനന്തൻ രചിച്ചതാണ് “മണിമണ്ഡപവും തങ്കധ്വജവും”.

നവംബർ 20-ാം തീയതി ശനിയാഴ്ച രാവിലെ 11 മണിയ്ക്ക് പന്തളം വലിയ കോയിക്കൽ ക്ഷേത്രസന്നിധിയിൽ കൊറിയൻ കോൺസുലേറ്റ് ജനറൽ സുരേഷ് ചുക്കപ്പിള്ളി, സാംസ്കാരിക, യുവജന, ഫിഷറീസ് വകുപ്പ് മന്ത്രി സജി ചെറിയാന് പുസ്തകം കൈമാറി പ്രകാശനം നിർവ്വഹിക്കും. കേരള നിയമസഭാ ഡെപ്യൂട്ടി സ്പീക്കർ സജി ചെറിയാൻ അധ്യക്ഷത വഹിക്കുന്ന ചടങ്ങിൽ പന്തളം നിർവ്വാഹക സമിതി പ്രസിഡന്റും മുൻരാജപ്രതിനിധിയുമായ മൂലം നാൾ ശശികുമാരവർമ്മ തമ്പുരാൻ മുഖ്യാതിഥിയാകും.

ചടങ്ങിൽ തിരുവാഭരണ പേടക വാഹക സംഘം ഗുരുസ്വാമി കുളത്തിനാൽ ഗംഗാധരൻ പിള്ള, ശബരിമല സ്വർണ്ണക്കൊടിമര നിർമ്മാണത്തിന്റെ മുഖ്യശിൽപി അനന്തൻ ആചാരിയേയും, ശിൽപി സദാശിവൻ ആചാരിയെയും ആദരിക്കും. ശബരിമല തന്ത്രി ബ്രഹ്മശ്രീ കണ്ഠ് രാജീവരര് തിരുമനസ്സുകൾ അനുഗ്രഹാശിസുകൾ അർപ്പിക്കും. അതേസമയം പുസ്തകത്തിന്റെ വിതരണാവകാശം പൂർണ്ണമായും പന്തളം കൊട്ടാരത്തിന് സമർപ്പിക്കും. ശബരിമലയിലെ സ്വർണ്ണക്കൊടിമരത്തിന്റെ വൃക്ഷപൂജ മുതൽ കൊടിമര പ്രതിഷ്ഠ വരെയുള്ള പൂർണ്ണമായ ചടങ്ങുകൾ വിശദമായി പുസ്തകത്തിൽ അവതരിപ്പിച്ചിട്ടുണ്ട്.