കീരവാണിയെ അഭിനന്ദിച്ച് സാക്ഷാൽ റിച്ചാര്‍ഡ് കാര്‍പ്പെന്റര്‍; നന്ദി പറഞ്ഞ് രാജമൗലി

ഓസ്കര്‍ വേദിയില്‍ ഇന്ത്യയുടെ അഭിമാനം എം.എം കീരവാണി വാനോളമുയര്‍ത്തിയിരുന്നു. ആർ.ആർ.ആറിലെ നാട്ടു നാട്ടു എന്ന ഗാനത്തിന് പുരസ്കാരം ഏറ്റുവാങ്ങുമ്പോള്‍ എം.എം കീരവാണി ഒരു ചെറു പ്രസംഗവും നടത്തി. കാര്‍പ്പെന്‍റേഴ്സ് കേട്ടാണ് ഞാന്‍ വളര്‍ന്നത്, ഇന്ന് ഓസ്‌കറുമായി ഇവിടെ നിൽക്കുന്നുവെന്നാണ് കീരവാണി പറഞ്ഞത്. ഇത് കേട്ട ചില മലയാളം മാധ്യമങ്ങൾ കീരവാണി കുട്ടിക്കാലത്ത് ആശാരിയുടെ തട്ടും മുട്ടും കേട്ടാണ് വളർന്നതെന്നാണ് റിപ്പോർട്ട് ചെയ്തത്.

എന്നാൽ ചുരുങ്ങിയ കാലം കൊണ്ട് ലോകശ്രദ്ധ നേടിയ വിഖ്യാത അമേരിക്കൻ സംഗീതജ്ഞരാണ് റിച്ചാർഡ് കാർപ്പെന്ററും അനിയത്തി കാരൻ കാർപ്പെന്ററും. കാർപ്പെന്റേഴ്സ് എന്ന പേരിലാണ് അവർ അറിയപ്പെട്ടത്. ഇപ്പോഴിതാ കീരവാണിക്ക് അഭിനന്ദനങ്ങളുമായി എത്തിയിരിക്കുകയാണ് സാക്ഷാല്‍ റിച്ചാര്‍ഡ് കാര്‍പ്പെന്റര്‍. കാര്‍പെന്റേഴ്‌സിന്റെ പ്രശസ്ത ഗാനമായ ഓണ്‍ ദ ടോപ്പ് ഓഫ് ദ വേള്‍ഡിന്റെ റീ ഇമാജിന്‍ഡ് വേര്‍ഷന്‍ പാടുന്ന വീഡിയോയാണ് കീരവാണിയെയും ആര്‍ആര്‍ആറിനെയും അഭിന്ദിക്കാനായി റിച്ചാര്‍ഡ് ഇന്‍സ്റ്റാഗ്രാമില്‍ പങ്കുവെച്ചിരിക്കുന്നത്. രാജമൗലിയും റിച്ചാര്‍ഡിന്റെ പോസ്റ്റിന് കമന്റുമായി എത്തിയിട്ടുണ്ട്. ഓസ്‌കാര്‍ ക്യാംപയ്‌നിടയില്‍ പോലും എന്റെ സഹോദരന്‍ വളരെ ശാന്തനായിരുന്നു. പുരസ്‌കാരം ലഭിക്കുന്നതിന് മുമ്പും ശേഷവും അദ്ദേഹം വികാരഭരിതനായിരുന്നില്ല. എന്നാല്‍ ഇപ്പോള്‍ ഇത് കണ്ടത് മുതല്‍ എന്റെ സഹോദരന് കണ്ണുനീര്‍ നിയന്ത്രിക്കുവാന്‍ സാധിക്കുന്നില്ല. ഇത് ഞങ്ങളുടെ കുടുംബത്തിന്റെ അവിസ്മരണീയ നിമിഷമാണെന്നാണ് രാജമൗലി കുറിച്ചത്.