സർദാർ ഉദ്ദം ടീസർ: സ്വാതന്ത്ര്യസമരസേനാനിയുടെ ‘നിരവധി മുഖങ്ങൾ’ വെളിപ്പെടുത്തി വിക്കി കൗശൽ; സമൂഹമാധ്യമങ്ങളിൽ ശ്രദ്ധേയമായി വീഡിയോ

ബോളിവുഡ് ചിത്രം സർദാർ ഉദ്ദമിൻറെ ആദ്യ ടീസർ പുറത്തിറങ്ങി. ഇക്കഴിഞ്ഞ ദിവസം സർദാർ ഉദ്ദമിലെ നായകനും, ഉറി ദി സർജിക്കൽ സ്ട്രൈക്ക് എന്ന ചിത്രത്തിലൂടെ സിനിമാപ്രേമികളുടെ ഹൃദയം കീഴടക്കിയ താരം വിക്കി കൗശലാണ് ടീസർ പുറത്തുവിട്ടത്. അതേസമയം ഈ ചിത്രവുമായി ബന്ധപ്പെട്ട് കൂടുതൽ കാര്യങ്ങൾ വെളിപ്പെടുത്തിയിരിക്കുകയാണ് താരം ഇപ്പോൾ. വിപ്ലവ സ്വാതന്ത്ര്യസമര സേനാനി സർദാർ ഉദ്ദം സിംഗിനെ കേന്ദ്രീകരിച്ചുള്ള ഒരു കൗതുകകരമായ വീഡിയോയാണ് താരം തന്റെ ഇൻസ്റ്റാഗ്രാം അക്കൗണ്ടിലൂടെ പുറത്തുവിട്ടിരിക്കുന്നത്.

ആ വീഡിയോ ക്ലിപ്പിൽ, കൗശലിന്റെ കഥാപാത്രം ഒരു ഡോക്യുമെന്റ് ഒരുമിച്ച് ചേർക്കുന്നത് നമുക്ക് കാണാം. പിന്നീട് വ്യത്യസ്ത പേരുകൾ പ്രദർശിപ്പിക്കുന്ന പാസ്‌പോർട്ടുകളുടെ ശേഖരത്തിലേക്കാണ് നമ്മുടെ ശ്രദ്ധയെ മാറ്റുന്നത്. അതിൽ നിരവധി ധീരന്മാരുടെ പേരുകൾക്കൊപ്പം സർദാർ ഉദ്ദം സിംഗിന്റെയും പാസ്സ്‌പോർട്ട് കാണിക്കുന്നുണ്ട്. ആ ചെറിയ വീഡിയോ വളരെ വലിയ ഒരു ത്രില്ലർ-ഡ്രാമയാണ് ചിത്രമെന്നാണ് സൂചിപ്പിക്കുന്നത്.

ഒടിടി റിലീസ് ആയി എത്തുന്ന ചിത്രം ഈ വർഷം ഒക്ടോബർ 16ന് ആമസോൺ പ്രൈം വീഡിയോയിൽ റിലീസ് ചെയ്യും. ഈ വർഷം ജനുവരിയിൽ ചിത്രം റിലീസ് ചെയ്യാൻ നേരത്തെ തീരുമാനിച്ചിരുന്നു. എന്നാൽ ഇത് പിന്നീട് മാറ്റിവയ്ക്കുകയായിരുന്നു. ഷൂജിത് സിർകാർ സംവിധാനം ചെയ്ത് റോണി ലാഹിരിയും ഷീൽ കുമാറും ചേർന്ന് നിർമ്മിച്ച ചിത്രത്തിൽ അമോൽ പരാശറും അഭിനയിക്കുന്നുണ്ട്. 1940 -ൽ പഞ്ചാബിലെ മുൻ ലെഫ്റ്റനന്റ് ഗവർണർ മൈക്കൽ ഒ ഡയറെ വധിച്ചതിന് പ്രശസ്തനായ സർദാർ ഉദ്ദം സിംഗിന്റെ ജീവിതത്തിന്റെ ചലച്ചിത്ര ആവിഷ്കാരം ആണ് സർദാർ ഉദ്ദം.1919 ഏപ്രിൽ 13 ന് അമൃത്സറിൽ നടന്ന ക്രൂരമായ ജാലിയൻവാലാബാഗ് കൂട്ടക്കൊലയ്ക്ക് പ്രതികാരം ചെയ്യാനായിരുന്നു ഈ കൊലപാതകം നടന്നത്. ചരിത്രത്തിൽ നമ്മുടെ സ്വാതന്ത്ര്യത്തിന് വഴിതെളിച്ച ഒരു സംഭവം കൂടിയാണ് ജാലിയൻവാലാബാഗ് കൂട്ടക്കൊല എന്നത്. ബ്രിട്ടീഷുകാരുടെ ക്രൂരണങ്ങൾക്കെതിരെ കൂടുതൽ ശക്തമായി തിരിച്ചടിക്കാൻ ഇതിലൂടെ സാധിച്ചു.