സിപിഎം ലോക്കൽ സെക്രട്ടറി ഷീദ് മുഹമ്മദിന്റെ എസ്ഡിപിഐ ബന്ധം ; അവധിയിൽ പോകാൻ നിർദേശിച്ച് സിപിഎം

ആലപ്പുഴ: എസ്ഡിപിഐ ബന്ധത്തെ തുടർന്ന് സിപിഎം ലോക്കൽ സെക്രട്ടറിയ്‌ക്ക് എതിരെ നടപടി സ്വീകരിച്ച് സി.പി.എം. ചെറിയനാട് സിപിഎം ലോക്കൽ കമ്മിറ്റി സെക്രട്ടറിയായ ഷീദ് മുഹമ്മദിനെതിരെയാണ് പാർട്ടി നടപടി കൈക്കൊണ്ടിരിക്കുന്നത്. നിർബന്ധിത അവധിയാണ് ഷീദ് മുഹമ്മദിന് പാർട്ടി നൽകിയിരിക്കുന്നത്.

ഷീദ് മുഹമ്മദിന്റെ എസ്ഡിപിഐ നേതാവുമായുള്ള ബന്ധം പാർട്ടി പ്രവർത്തകർക്കിടയിൽ തന്നെ വലിയ വിമർശനത്തിന് കാരണമായിരുന്നു. കൂടാതെ, എസ്ഡിപിഐ നേതാവിന്റെ ഹോട്ടൽ സംരംഭത്തിൽ ഷീദ് മുഹമ്മദ് പങ്കാളിയാണെന്നും ആക്ഷേപമുയർന്നിരുന്നു. എന്നാൽ എസ്ഡിപിഐ നേതാവുമായി തനിക്ക് യാതൊരു ബന്ധവുമില്ലെന്നായിരുന്നു സി.പി.എം ലോക്കൽ സെക്രട്ടറിയുടെ വിശദീകരണം.

അതേസമയം, ഷീദ് മുഹമ്മദിനെതിരെ നടപടിയെടുക്കാത്തതിൽ പ്രതിഷേധിച്ച് പാർട്ടിയിൽ തന്നെ തർക്കം രൂക്ഷമായിരുന്നു. നടപടിയെടുക്കാൻ വൈകിയതിൽ പ്രതിഷേധിച്ച് 38 അംഗങ്ങളാണ് ചെറിയനാട് ലോക്കൽ കമ്മിറ്റിയിൽ നിന്നും പാർട്ടിയിൽ നിന്നും രാജിവെച്ചത്. എസ്ഡിപിഐ നേതാവിന് പങ്കാളിത്തമുള്ള ഹോട്ടൽ സംരഭം ഉദ്ഘാടനം ചെയ്തത് ചെങ്ങന്നൂർ എംഎൽഎയും മന്ത്രിയുമായ സജി ചെറിയാനായിരുന്നു. സ്വന്തം സ്ഥാപനമാണെന്ന് പറഞ്ഞായിരുന്നു ഷീദ് മുഹമ്മദ് ഉദ്ഘാടനത്തിനായി മന്ത്രി സജി ചെറിയാനെ ക്ഷണിച്ചത്. എന്നാൽ ചടങ്ങിൽ എസ്ഡിപിഐ നേതാക്കളടക്കം പങ്കെടുത്തിരുന്നു.