തിരുവനന്തപുരം: കോവിഡിന്റെ പുതിയ വകഭേദമായ ഒമിക്രോണ് (Omicron) ബി.1.1.529 നിരവധി രാജ്യങ്ങളില് റിപ്പോര്ട്ട് ചെയ്ത പശ്ചാത്തലത്തില് മുന്കരുതല് നടപടികളുമായി സംസ്ഥാന സര്ക്കാര്. കേന്ദ്ര മാര്ഗനിര്ദേശങ്ങളില് പറയുന്ന വിദേശരാജ്യങ്ങളില് നിന്ന് കേരളത്തിലേക്ക് യാത്ര തിരിക്കുന്നവര് 72 മണിക്കൂറിനകം ആര്ടിപിസിആര് പരിശോധന നടത്തി നെഗറ്റീവ് സര്ട്ടിഫിക്കറ്റ് എയര്സുവിധ പോര്ട്ടലില് അപ്ലോഡ് ചെയ്യണം. ഇവർ കോവിഡ് പോസിറ്റീവായാൽ ജനിതക ശ്രേണീകരണത്തിനു സാംപിൾ അയയ്ക്കണമെന്ന കേന്ദ്ര നിർദേശവും സംസ്ഥാനത്തിനു ലഭിച്ചു.
പൊതുമാർഗരേഖ നൽകിയിട്ടില്ലെങ്കിലും യുകെ, യൂറോപ്യൻ രാജ്യങ്ങൾ, ഇസ്രയേൽ, ഹോങ്കോങ്, ദക്ഷിണാഫ്രിക്ക, ബോട്സ്വാന, ബ്രസീൽ, ബംഗ്ലദേശ്, ചൈന, മൊറീഷ്യസ്, ന്യൂസീലൻഡ്, സിംബാബ്വെ, സിംഗപ്പൂർ എന്നിവിടങ്ങളിൽ നിന്നുള്ള യാത്രക്കാർക്ക് അധികസുരക്ഷ ഉറപ്പാക്കണമെന്നു കേന്ദ്രസർക്കാർ നിർദേശിച്ചിട്ടുണ്ട്.
