ആണവായുധങ്ങൾ ഉപേക്ഷിച്ചുള്ള കരാറിൽ ഒപ്പുവെച്ചില്ലെങ്കിൽ കടുത്ത സൈനിക നടപടി! ഇറാനിലേക്ക് നാവികപ്പടയെ അയച്ച് ട്രമ്പ് ! പശ്ചിമേഷ്യയിൽ യുദ്ധഭീതി

പശ്ചിമേഷ്യയിൽ വീണ്ടും യുദ്ധകാഹളം മുഴക്കിക്കൊണ്ട് ഇറാനെതിരെ സൈനിക ഭീഷണി മുഴക്കി അമേരിക്കൻ പ്രസിഡന്റ് ഡൊണാൾഡ് ട്രമ്പ് . അത്യാധുനിക യുദ്ധവിമാനവാഹിനി കപ്പലായ എബ്രഹാം ലിങ്കന്റെ നേതൃത്വത്തിലുള്ള വൻ നാവികപ്പട (Massive Armada) ഇറാൻ ലക്ഷ്യമാക്കി നീങ്ങുകയാണെന്ന് ട്രമ്പ് പ്രഖ്യാപിച്ചു. എത്രയും വേഗം ചർച്ചകൾക്ക് തയ്യാറായി ആണവായുധങ്ങൾ ഉപേക്ഷിച്ചുള്ള കരാറിൽ ഒപ്പുവെച്ചില്ലെങ്കിൽ കടുത്ത സൈനിക നടപടി നേരിടേണ്ടി വരുമെന്നാണ് ട്രമ്പിന്റെ മുന്നറിയിപ്പ്. വെനസ്വേലയിലേക്ക് അയച്ചതിനേക്കാൾ വലിയ സൈനിക സന്നാഹമാണ് ഇതെന്നും ആവശ്യമായി വന്നാൽ അതിവേഗത്തിലും അക്രമാസക്തമായും ദൗത്യം പൂർത്തിയാക്കാൻ സേനയ്ക്ക് നിർദ്ദേശം നൽകിയിട്ടുണ്ടെന്നും തന്റെ സോഷ്യൽ മീഡിയ പ്ലാറ്റ്‌ഫോമായ ട്രൂത്ത് സോഷ്യലിലൂടെ ട്രമ്പ് വ്യക്തമാക്കി.

നേരത്തെ വെനസ്വേലയിൽ നടത്തിയ ‘ഓപ്പറേഷൻ മിഡ്‌നൈറ്റ് ഹാമർ’ എന്ന സൈനിക നീക്കത്തിലൂടെ അന്നത്തെ പ്രസിഡന്റ് നിക്കോളാസ് മഡുറോയെയും ഭാര്യയെയും തടവിലാക്കിയ സംഭവം ട്രമ്പ് ഇറാനെ ഓർമ്മിപ്പിച്ചു. ഇറാനുമായുള്ള സമയം അവസാനിക്കുകയാണെന്നും അടുത്ത ആക്രമണം മുൻപത്തെക്കാൾ ഭീകരമായിരിക്കുമെന്നും അദ്ദേഹം കുറിച്ചു. യുറേനിയം സമ്പുഷ്ടീകരണം നിർത്തുക, ദീർഘദൂര മിസൈലുകളുടെ എണ്ണം കുറയ്ക്കുക തുടങ്ങിയ കർശന വ്യവസ്ഥകളാണ് കരാറിനായി അമേരിക്ക മുന്നോട്ട് വെച്ചിട്ടുള്ളത്. എന്നാൽ അമേരിക്കയുടെ ഈ പ്രകോപനപരമായ നീക്കത്തിന് കനത്ത തിരിച്ചടിയാണ് സൗദി അറേബ്യയുടെ ഭാഗത്തുനിന്നുണ്ടായിരിക്കുന്നത്.

ഇറാനെതിരെയുള്ള സൈനിക നീക്കത്തിനായി സൗദി അറേബ്യയുടെ ആകാശമോ ഭൂമിയോ വിട്ടുകൊടുക്കില്ലെന്ന് സൗദി കിരീടാവകാശി മുഹമ്മദ് ബിൻ സൽമാൻ അസീസ് അൽ സൗദ് പ്രഖ്യാപിച്ചു. ഇറാന്റെ പരമാധികാരത്തെ മാനിക്കുന്നുവെന്നും ഏത് പക്ഷത്തുനിന്നുള്ള ആക്രമണമായാലും അതിനായി സൗദിയുടെ മണ്ണ് ഉപയോഗിക്കാൻ അനുവദിക്കില്ലെന്നും സൗദി പ്രസ് ഏജൻസി പുറത്തിറക്കിയ പ്രസ്താവനയിൽ പറയുന്നു. മേഖലയിലെ പ്രമുഖ ശക്തിയായ സൗദി അറേബ്യയുടെ ഈ നിലപാട് അമേരിക്കയുടെ സൈനിക തന്ത്രങ്ങളെ പ്രതിസന്ധിയിലാക്കാൻ സാധ്യതയുണ്ട്.