ലൈംഗീക ബന്ധത്തിന് നിർബന്ധിച്ചു; വഴങ്ങാത്തതിനാൽ തൊഴിൽപീഡനം; ഒടുവിൽ സഹികെട്ട് ആത്മഹത്യാ ശ്രമം; സിഐടിയു നേതാവിനെതിരെ വിമാനത്താവളം ജീവനക്കാരിയുടെ പരാതി

കൊച്ചി: സിഐടിയു നേതാവ് നിരന്തരമായി ലൈംഗീക ചുവയോടെ സംസാരിച്ചുവെന്നും ലൈംഗീക ബന്ധത്തിന് പ്രേരിപ്പിച്ചുവെന്നും വഴങ്ങാത്തതിനാൽ തൊഴിൽ പീഡനം തുടർന്നെന്നും പരാതി. സിഐടിയു നേതാവ് സി എം തോമസിന് എതിരെയാണ് പരാതി. നെടുമ്പാശ്ശേരി വിമാനത്താവളത്തിലെ ജീവനക്കാരിയാണ് പരാതി നൽകിയിരിക്കുന്നത്. എന്നാൽ സിപിഎം ഇയാളെ സംരക്ഷിക്കുകയാണെന്നും നടപടികൾ സ്വീകരിക്കുന്നില്ലെന്നും ജീവനക്കാരി ആരോപിക്കുന്നു.

നേതാവ് കീഴ് ജീവനക്കാരിയായ തന്നോട് പക മനസ്സിൽ വച്ച് പെരുമാറിയെന്നും അസൗകര്യമുണ്ടാക്കുന്ന രീതിയിൽ തന്റെ ഷിഫ്റ്റ് ക്രമീകരിച്ചുവെന്നും ജീവനക്കാരി പറയുന്നു. എന്ന് വഴങ്ങുന്നുവോ എന്നുവരെ തൊഴിൽ പീഡനം തുടരുമെന്ന് ഭീഷണിപ്പെടുത്തുകയും ചെയ്‌തു.

മാനസിക പീഡനം പരിധിവിട്ടതോടെ സഹികെട്ട് ആത്മഹത്യ ചെയ്യാൻ ശ്രമിക്കുകയായിരുന്നു. രക്ത സമ്മർദ്ദത്തിനുള്ള അമ്പതോളം ഗുളികകൾ കഴിച്ചാണ് ആത്മഹത്യയ്ക്ക് ശ്രമിച്ചത്. എന്നാൽ കൃത്യസമയത്ത് ചികിത്സ ലഭിച്ച യുവതിയുടെ ജീവൻ രക്ഷിക്കാൻ കഴിഞ്ഞു. കഴിഞ്ഞ ജനുവരി 30 നാണ് ഇവർ ആത്മഹത്യയ്ക്ക് ശ്രമിച്ചത്.

പി ഡബ്ള്യു എം എസ് എന്ന ഏജൻസിയാണ് വിമാനത്താവളത്തിൽ ലോഡിങ് ആൻഡ് അൺ ലോഡിങ് ജോലികൾ ചെയ്യുന്നത്. ഈ ഏജൻസിയുടെ കീഴിലുള്ള ജീവനക്കാരാണ് ഇരുവരും. പരാതിയെ തുടർന്ന് സി ഐ ടി യു നേതാവിനെ താൽക്കാലികമായി ജോലിയിൽ നിന്ന് മാറ്റിനിർത്തിയിരിക്കുകയാണ്. ഇയാൾ കാരണം മറ്റൊരു യുവതി നേരത്തെ ആത്മഹത്യ ചെയ്‌തിട്ടുണ്ടെന്നും ആരോപണമുണ്ട്.

എന്നാൽ ഇയാൾക്കെതിരെ നിയമ നടപടി വേണമെന്ന ആവശ്യമാണ് ജീവനക്കാരി മുന്നോട്ട് വയ്ക്കുന്നത്. റൂറൽ എസ് പി വൈഭവ് സക്സേനയ്ക്ക് പരാതി നൽകിയിട്ടുണ്ട്. പ്രതിപക്ഷ നേതാവ് വി ഡി സതീശൻ അടക്കം വിഷയത്തിൽ ഇടപെട്ടതായാണ് സൂചന.