കർണാടകയിലെ ഷിരൂരിലുണ്ടായ മണ്ണിടിച്ചിലിൽ കാണാതായ മലയാളി ട്രക്ക് ഡ്രൈവര് അര്ജുനെ കണ്ടെത്താനുള്ള തെരച്ചിലിനായി ഡ്രെഡ്ജര് എത്തിക്കുന്നതില് പ്രതിസന്ധി. ഗോവയിലെ ഡ്രെഡ്ജിംഗ് കമ്പനിയുടെ എംഡിയാണ് ഡ്രെഡ്ജര് എത്തിക്കുന്നത് വൈകുമെന്ന് അറിയിച്ചത്. ഡ്രെഡ്ജര് എത്തിക്കാൻ ഇനിയും ഒരാഴ്ച സമയം എടുക്കുമെന്ന് കമ്പനിയുടെ എംഡി മഹേന്ദ്ര ഡോഗ്രെ പറഞ്ഞു. ഡ്രഡ്ജര് കടലിലൂടെ കൊണ്ട് വരാനുള്ള അന്തിമ അനുമതി ലഭിച്ചതിന് ശേഷമേ ഗോവയിൽ നിന്ന് ഡ്രെഡ്ജർ പുറപ്പെടുകയുള്ളു . ഇഇഇ അനുമതി ഇന്ന് തന്നെ ലഭിക്കുമെന്നാണ് കരുതുന്നത്. 28.5 മീറ്റര് നീളവും 8.5 മീറ്റര് വീതിയും രണ്ടു മീറ്റര് ആഴവുമുള്ള ഡ്രെഡ്ജര് ആണ് എത്തിക്കുന്നത്. ഡ്രാഫ്റ്റിന് മൂന്ന് മീറ്റര് നീളമാണുള്ളത്. വരുന്ന വഴിയിലെ പാലങ്ങളുടെ തൂണുകൾക്കിടയിൽ 15 മീറ്റർ വീതി ഉണ്ട്. ഡ്രെഡ്ജറിന് 8.5 മീറ്റർ മാത്രമാണ് വീതി. അത് കൊണ്ട് പാലങ്ങൾ തസമാവില്ലെന്നും മഹേന്ദ്ര പറഞ്ഞു.
പുഴയിലെ മണ്ണ് നീക്കം ചെയ്ത് പരിശോധിക്കുന്നതിനായാണ് ഡ്രെഡ്ജര് എത്തിക്കുന്നത്. പുഴയുടെ അടിത്തട്ടിൽ കല്ലുകളും മരങ്ങളും അടിഞ്ഞു കൂടി കിടക്കുന്നതിനാൽ തെരച്ചിൽ ദുഷ്കരമാണെന്ന് ഡൈവിങ് വിദഗ്ദർ പറഞ്ഞിരുന്നു.
ഇതിനിടെ, ഗംഗാവലി പുഴയില് നാവിക സേന ഇന്ന് നടത്തിയ തെരച്ചിലിലാണ് കൂടുതല് ലോഹ ഭാഗങ്ങള് കണ്ടെത്തി. എന്നാൽ ഇന്ന് കണ്ടെത്തിയ ലോഹ ഭാഗം അർജുൻ ഓടിച്ച ലോറിയുടേത് അല്ലെന്നും ടാങ്കറിന്റേത് ആകാനാണ് സാധ്യതയെന്നും ലോറിയുടെ ഉടമ പറഞ്ഞു.
