“മഞ്ഞലയിൽ മുങ്ങി തോര്‍ത്തി, ഒന്നിനി ശ്രുതി താഴ്ത്തി, അനുരാഗ ഗാനം പോലെ, ശിശിരകാല മേഘമിഥുന……. ”ഭാവഗാനങ്ങളുമായി സംഗീതപ്രേമികളുടെ ഹൃദയം കീഴടക്കിയ പി ജയചന്ദ്രന് ഇന്ന് 78 ആം പിറന്നാൾ മധുരം

മധുരതരമായ ഗാനങ്ങളിലൂടെ മലയാളികളുടെ ഭാവഗായകനായി മാറിയ പി ജയചന്ദ്രന് ഇന്ന് 78 ആം പിറന്നാൾ(P Jayachandran Birthday). സംഗീതപ്രേമികളെ നിരന്തരം തന്റെ മനോഹരമായ ശബ്ദത്തിലൂടെ ആനന്ദത്തിലാറാടിയ്ക്കുന്ന ജയചന്ദ്രനെ മലയാളസിനിമാലോകം സ്‌നേഹപൂര്‍വ്വം ജയേട്ടനെന്നാണ് വിളിയ്ക്കുന്നത്.

സംഗീതപ്രേമികളുടെ കാതോരത്ത് ഭാവഗാനങ്ങളുമായ് അദ്ദേഹം മെല്ലെ തഴുകിയെത്തിയിട്ട് അഞ്ച് പതിറ്റാണ്ടിലേറെയായി, ഇതുവരെ പതിനയ്യായിരത്തിലേറെ പാട്ടുകൾ അദ്ദേഹം സമ്മാനിച്ചിട്ടുണ്ട്
മഞ്ഞലയിൽ മുങ്ങി തോര്‍ത്തി, ഒന്നിനി ശ്രുതി താഴ്ത്തി, അനുരാഗ ഗാനം പോലെ, ശിശിരകാല മേഘമിഥുന, പൂവേ പൂവേ പാലപ്പൂവേ, പൊന്നുഷസ്സെന്നും, തേരിറങ്ങും മുകിലേ, സ്വയം വര ചന്ദ്രികേ, ആലിലത്താലിയുമായ്, നീയൊരു പുഴയായ്, തങ്കമനസ്സ് അമ്മ മനസ്സ്, ഇതളൂര്‍ന്നു വീണ, ഓലഞ്ഞാലി കുരുവി തുടങ്ങി എത്ര കേട്ടാലും മതിവരാത്ത അനേകമനേകം ഗാനങ്ങളിലൂടെ മലയാളികളുടെ കാതോരത്ത് കൂടുകൂട്ടിയ പാട്ടുപെട്ടിയാണ് ഭാവഗായകൻ പി ജയചന്ദ്രൻ.

1965 മുതൽ സിനിമാ സംഗീത ലോകത്തുള്ളയാളാണ് പി ജയചന്ദ്രൻ. മലയാളം, കന്നഡ, തമിഴ്, തെലുങ്ക് ഭാഷകളിൽ അദ്ദേഹം നിരവധി ഗാനങ്ങൾ ആലപിച്ചിട്ടുണ്ട്. ബോളിവുഡിലും അദ്ദേഹം സാന്നിധ്യമറിയിച്ചിട്ടുണ്ട്. പ്രതി പൂവൻ കോഴി എന്ന സിനിമയിലാണ് അദ്ദേഹം ഒടുവിലായി പാടിയത്.
1944 മാര്‍ച്ച് മൂന്നിന് ഇരിങ്ങാലക്കുട പാലിയത്ത് ജനിച്ച അദ്ദേഹം സുവോളജിയിൽ ബിരുദം നേടിയിട്ടുണ്ട്. സ്കൂള്‍ കലോത്സവങ്ങളിൽ മൃദംഗവും ലളിതഗാനത്തിലും നിരവധി സമ്മാനങ്ങൾ അദ്ദേഹത്തിന് ലഭിച്ചിട്ടുണ്ട്. ശാസ്ത്രീയമായി സംഗീതം അഭ്യസിക്കാതെയാണ് അദ്ദേഹം സംഗീതലോകത്തേക്ക് എത്തിയത്. ഭാര്യ ലളിത, മക്കള്‍ ലക്ഷ്മിയും ദിനനാഥുമാണ്. ഇത്തവണ പ്രത്യേകിച്ച്‌ പിറന്നാൾ ആഘോഷങ്ങളില്ല. കുടുംബത്തോടൊപ്പം ചെലവഴിക്കാനാണ്‌ പി ജയചന്ദ്രന്റെ തീരുമാനം. ഭാര്യ ലളിതയ്‌ക്കും മക്കളായ ദിനനാഥിനും ലക്ഷ്മിയ്‌ക്കുമൊപ്പം തൃശൂർ പൂങ്കുന്നം വിശ്രാം അപാർട്‌മെന്റ്‌സിൽ ഗുൽമോഹർ ഫ്ലാറ്റിലാണ്‌ താമസം. കുംഭത്തിലെ തിരുവാതിരയാണ്‌ ജന്മനാൾ. അത്‌ ഇത്തവണ മാർച്ച് പന്ത്രണ്ടിനാണ്‌. അന്ന്‌ അടുത്ത സുഹൃത്തുക്കളും ബന്ധുക്കളുമൊത്ത്‌ ചെറിയ ആഘോഷമുണ്ടാകും.

സംഗീതത്തിൽ അദ്ദേഹത്തിന്‍റെ ആദ്യ ഗുരു രാമനാഥൻ മാഷാണ്. സിനിമയിൽ ദേവരാജൻ മാഷും. സ്വന്തം പിതാവിനെപ്പോലെയാണ് തനിക്ക് ദേവരാജൻ മാഷെന്ന് അഭിമുഖങ്ങളിൽ പി ജയചന്ദ്രൻ പറഞ്ഞിട്ടുണ്ട്. അത്രയ്ക്ക് ജീവിതത്തിൽ അദ്ദേഹം സ്വാധീനിച്ചിട്ടുണ്ടെന്നും അദ്ദേഹത്തിന്‍റെ വാക്കുകള്‍. അര്‍ജ്ജുനൻ മാഷിനെ ദൈവതുല്യനായാണ് പി ജയചന്ദ്രൻ കാണുന്നത്. വി ദക്ഷിണാമൂര്‍ത്തി, ബാബുരാജ്, രാഘവൻ മാഷ് ഇവരും അദ്ദേഹത്തിന്‍റെ സിനിമാ സംഗീത ജീവിതത്തിൽ ഏറെ സ്വാധീനം ചെലുത്തിയവരാണ്.

1965-ൽ കളിത്തോഴൻ എന്ന സിനിമയിൽ പി ഭാസ്കരൻ എഴുതി ജി ദേവരാജൻ മാഷ് ഈണമിട്ട മഞ്ഞലയിൽ മുങ്ങി തോര്‍ത്തി എന്ന പാട്ടുപാടിക്കൊണ്ടാണ് അദ്ദേഹം സിനിമ സംഗീത ലോകത്തേക്ക് എത്തിയത്. ശേഷം ഇതുവരെ നിരവധി സിനിമകളിൽ മധുരതരമായ പാട്ടുകളിലൂടെ അദ്ദേഹം വിസ്മയിപ്പിച്ചിട്ടുണ്ട്. ട്രിവാൻഡ്രം ലോഡ്ജ് ഉൾപ്പെടെ ചില സിനിമകളിൽ അഭിനയിച്ചിട്ടുമുണ്ട് അദ്ദേഹം.1986ല്‍ ഇറങ്ങിയ ശ്രീനാരായണ ഗുരുവെന്ന ചിത്രത്തിന് വേണ്ടി പാടിയ ശിവശങ്കരാ സര്‍വ്വ…. എന്നു തുടങ്ങുന്ന ഗാനത്തിലൂടെ മികച്ച പിന്നണി ഗായകനുള്ള ദേശീയ പുരസ്‌കാരം അദ്ദേഹത്തെ തേടിയെത്തുകയുണ്ടായി. 1972, 1978, 1999, 2000, 2004, 2015 തുടങ്ങിയ വര്‍ഷങ്ങളിൽ ഏതാനും പാട്ടുകളിലൂടെ മികച്ച പിന്നണി ഗായകനുള്ള സംസ്ഥാന പുരസ്‌കാരം അദ്ദേഹത്തെ തേടിയെത്തി. 1994ലും 1997ലും തമിഴ്‌നാട് സര്‍ക്കാര്‍ പുരസ്‌കാരവും അദ്ദേഹത്തിന് ലഭിച്ചിട്ടുണ്ട്.