സമർപ്പിത സേവനത്തിന്റെ ആറ് പതിറ്റാണ്ടുകൾ ! വജ്രജൂബിലിയുടെ നിറവിൽ പാങ്ങോട് സൈനിക കേന്ദ്ര ആസ്ഥാനം

തിരുവനന്തപുരം: ഇന്ത്യൻ സൈന്യത്തിനും രാജ്യത്തിനും ആറ് പതിറ്റാണ്ടുകാലത്തെ സമർപ്പിത സേവനം പൂർത്തിയാക്കി തിരുവനന്തപുരം പാങ്ങോട് സൈനിക കേന്ദ്ര ആസ്ഥാനം അതിന്റെ അറുപതാം സ്ഥാപക ദിനം ആഘോഷിച്ചു. 1966 ജൂൺ 29-ന് സ്ഥാപിതമായ സൈനിക ആസ്ഥാനത്തിന്റെ വജ്രജൂബിലി ആഘോഷങ്ങൾക്ക് യുദ്ധസ്മാരകത്തിൽ നടന്ന പുഷ്പചക്ര സമർപ്പണത്തോടെയാണ് തുടക്കമായത്. തുടർന്ന് നടന്ന പ്രത്യേക സൈനിക സമ്മേളനത്തിൽ പാങ്ങോട് സൈനിക കേന്ദ്ര മേധാവി ബ്രിഗേഡിയർ അനുരാഗ് ഉപാധ്യായ മികച്ച സേവനം കാഴ്ചവെച്ച ഉദ്യോഗസ്ഥരെ ആദരിച്ചു. ദക്ഷിണേന്ത്യയിലെ സൈനിക സേവന നിർവ്വഹണം, സൈനിക കേന്ദ്രങ്ങളുടെ കൃത്യമായ നടത്തിപ്പ്, വിമുക്ത ഭടൻമാരുടെ ക്ഷേമം എന്നിവയ്ക്കുള്ള പ്രധാന കേന്ദ്രമായാണ് ഈ ആസ്ഥാനം പ്രവർത്തിക്കുന്നതെന്ന് അദ്ദേഹം ചടങ്ങിൽ എടുത്തുപറഞ്ഞു.

കേരളത്തിലും തമിഴ്‌നാട്ടിലുമായി നിലവിൽ സേവനമനുഷ്ഠിക്കുന്ന ഉദ്യോഗസ്ഥരും വിമുക്തഭടന്മാരും അവരുടെ കുടുംബാംഗങ്ങളും ഈ വജ്രജൂബിലി ആഘോഷങ്ങളിൽ പങ്കാളികളായി. കഴിഞ്ഞ ആറ് പതിറ്റാണ്ടുകളായി പാങ്ങോട് സൈനിക കേന്ദ്ര ആസ്ഥാനം കൈവരിച്ച സമ്പന്നമായ പൈതൃകവും സംഭാവനകളും പ്രദർശിപ്പിക്കുന്ന വിപുലമായ സാംസ്കാരിക സായാഹ്നവും ഇതിനോടനുബന്ധിച്ച് സംഘടിപ്പിച്ചിരുന്നു. കേരളത്തിന്റെ സാംസ്കാരിക പൈതൃകം വിളിച്ചോതുന്ന കഥകളി, തെയ്യം, ശിങ്കാരി മേളം, മോഹിനിയാട്ടം, ഒപ്പന തുടങ്ങിയ പരമ്പരാഗത കലാരൂപങ്ങൾ ചടങ്ങിൽ അരങ്ങേറി.

കേരളത്തിലും തമിഴ്‌നാട്ടിലുമായി പരന്നുകിടക്കുന്ന 11 ഇ.സി.എച്ച്.എസ് പോളിക്ലിനിക്കുകൾ, ഒരു സമർപ്പിത വെറ്ററൻ സെൽ, 10 വിമുക്തഭട കാന്റീനുകൾ എന്നിവയുടെ നടത്തിപ്പിലൂടെ ഏകദേശം 5.97 ലക്ഷം വിമുക്തഭടന്മാർക്കും വിധവകൾക്കും ആശ്രിതർക്കും താങ്ങായി നിലകൊള്ളുന്നത് ഈ സൈനിക ആസ്ഥാനമാണ്. അടിസ്ഥാന സൗകര്യ വികസനം, വിദ്യാഭ്യാസ സ്ഥാപനങ്ങളുടെ ഭരണം, മാനുഷിക സഹായം, ദുരന്ത നിവാരണ പ്രവർത്തനങ്ങൾ, സിവിൽ-സൈനിക ബന്ധം സുദൃഢമാക്കൽ, സൈനികരുടെ ഭൗതിക ശരീരങ്ങളോടുള്ള ആദരവ് പ്രകടിപ്പിക്കൽ തുടങ്ങിയ വൈവിധ്യമാർന്ന ഉത്തരവാദിത്തങ്ങളും ഈ കേന്ദ്രം നിർവ്വഹിക്കുന്നുണ്ട്. വെല്ലുവിളികളെ അതിജീവിച്ച് രാജ്യത്തിന് വേണ്ടി മികച്ച സേവനം കാഴ്ചവയ്ക്കുന്നതിനാൽ “ദി മൂവേഴ്‌സ്” എന്ന് വിശേഷിപ്പിക്കപ്പെടുന്ന ഈ സ്റ്റേഷൻ ആസ്ഥാനം പ്രതിരോധശേഷിയുടെയും പ്രതിബദ്ധതയുടെയും പ്രതീകമാണെന്ന് ബ്രിഗേഡിയർ അനുരാഗ് ഉപാധ്യായ കൂട്ടിച്ചേർത്തു. പാങ്ങോട് സൈനിക കേന്ദ്രത്തിന്റെ വളർച്ചയ്ക്കായി പ്രവർത്തിച്ച എല്ലാവരുടെയും ഒത്തുചേരലോടെ സമാപിച്ച ചടങ്ങിൽ അഡ്മിൻ കമാൻഡൻ്റായ കേണൽ സൂര്യ മുഖർജി നന്ദി രേഖപ്പെടുത്തി.