തൊടുപുഴ: കുമളി ചെങ്കരയില് അമ്മയെ ഷോക്കടിപ്പിച്ച് കൊലപ്പെടുത്താന് മകന്റെ ശ്രമം. മകന്റെ ജീവിതത്തിന് അമ്മ തടസ്സമാകുന്നു എന്ന കാരണം ആരോപിച്ചാണ് കൊലപാതക ശ്രമം. അമ്മയ്ക്ക് ഭക്ഷണം നല്കാതെയും, അമ്മയുടെ ആവശ്യം നടത്തി കൊടുക്കാതെയും ആയിരുന്നു മകന്റെ ക്രൂരത.
കുമളി ചെങ്കര എച്ച്എംഎല് എസ്റ്റേറ്റ് സ്വദേശി രാജേന്ദ്രനാണ് അമ്മ മരിയ ശെല്വത്തെ ഷോക്കടിപ്പിച്ച് കൊലപ്പെടുത്താന് ശ്രമിച്ചത്. പൂട്ടിയിട്ടിരുന്ന വീടിന്റെ വാതില് തുറക്കാന് ശ്രമിക്കുന്നതിനിടയില് ഷോക്കേറ്റ് തെറിച്ചു വീഴുകയായിരുന്നു. ഉടന് തന്നെ നാട്ടുകാര് ഇവരെ കുമളിയിലെ സ്വകാര്യ ആശുപത്രിയില് എത്തിച്ചു. തുടര്ന്ന് നാട്ടുകാര് നടത്തിയ പരിശോധനയില് വൈദ്യുത ബോര്ഡില് നിന്നും പൂട്ടിലേയ്ക്ക് കണക്ഷന് കൊടുത്തിരിക്കുന്നതായി കണ്ടെത്തി.
നാട്ടുകാരുടെ പരാതിയെ തുടര്ന്ന് പോലിസ് നടത്തിയ അന്വേഷണത്തിലാണ് മകനെ അറസ്റ്റ് ചെയ്തത്. അമ്മയുടെ പെന്ഷന് തുക നല്കാത്തതിന്റെ വൈരാഗ്യത്തിലാണ് കൊലപ്പെടുത്താന് ശ്രമിച്ചതെന്ന് പോലീസ് പറഞ്ഞു.
മകന്റെ ജീവിതത്തിന് അമ്മ തടസ്സമാകുന്നതായും അമ്മയുടെ ആവശ്യങ്ങള് നിറവേറ്റാതെയും പട്ടിണിക്കിട്ടും ക്രൂരത കാട്ടിയിരുന്നതായും കൂടുതല് അന്വേഷണത്തില് തെളിഞ്ഞു.പ്രതിയ്ക്കെതിരെ കൊലപാത ശ്രമത്തിന് കുമിളി പോലീസ് കേസെടുത്തു.
