26 ദിവസം നീണ്ട നിരാഹാര സമരം അവസാനിപ്പിച്ച് സോനം വാങ്ചുക്; ഉപവാസമവസാനിപ്പിച്ചത് കേന്ദ്രമന്ത്രിമാരായ ജെ.പി നദ്ദ , ഡോ. ജിതേന്ദ്ര സിംഗ് എന്നിവരുടെ സാന്നിധ്യത്തിൽ

ദില്ലി : സിജെപി പ്രതിഷേധത്തിന് ഐക്യദാർഢ്യം പ്രഖ്യാപിച്ച് പ്രമുഖ പരിസ്ഥിതി പ്രവർത്തകൻ സോനം വാങ്ചുക് നടത്തിവന്ന നിരാഹാര സമരം 26-ാം ദിവസം അവസാനിപ്പിച്ചു. ഗുരുഗ്രാമിലെ മേദാന്ത ആശുപത്രിയിൽ ചികിത്സയിലായിരുന്ന അദ്ദേഹത്തിന്, കേന്ദ്രമന്ത്രിമാരായ ജെ.പി നദ്ദ , ഡോ. ജിതേന്ദ്ര സിംഗ് എന്നിവരുടെ സാന്നിധ്യത്തിലാണ് സമരം അവസാനിപ്പിച്ചത്. കേന്ദ്രമന്ത്രിമാർ നൽകിയ ഉറപ്പുകളെ തുടർന്നാണ് തീരുമാനം.

പ്രക്ഷോഭത്തിൽ പങ്കെടുത്ത വിദ്യാർത്ഥികൾക്കെതിരെ യാതൊരുവിധ നിയമനടപടികളും സ്വീകരിക്കില്ലെന്ന് കേന്ദ്ര സർക്കാർ വാഗ്ദാനം ചെയ്തിട്ടുണ്ട്. കൂടാതെ പരീക്ഷാ ചോർച്ച തടയുന്നതിനും വിദ്യാഭ്യാസ മേഖലയിൽ ആവശ്യമായ പരിഷ്കാരങ്ങൾ കൊണ്ടുവരുന്നതിനും മുൻഗണന നൽകുമെന്നും, ക്രമക്കേടുകൾ മൂലം ദുരിതത്തിലായവരുടെ ആശങ്കകൾ പരിഹരിക്കാൻ നടപടിയെടുക്കുമെന്നും മന്ത്രിമാർ ഉറപ്പുനൽകി. ഈ വിഷയത്തിൽ ചർച്ചകൾ പൂർത്തിയായതായും തുടർനടപടികൾ വരും ദിവസങ്ങളിൽ അറിയിക്കുമെന്നും വാങ്ചുക് അറിയിച്ചു.